Gjatë 24 orëve të kaluara, Republika e Irlandës nuk e ka shënuar asnjë viktimë të re nga koronavirusi.
Sidoqoftë, gjatë kësaj periudhe u shënuan 59 raste të reja të infektimeve. Deri më tani, Irlanda i ka regjistruar 1,606 viktima të sëmundjes së re dhe 24,698 të infektuar, shkruan “BBC”.
Zyrtari kryesor shëndetësor në këtë shtet, Dr. Tony Holohan, tha se Irlanda e ka shtypur sëmundjen si shtet. “Janë nevojitur masa të rrepta për ta arritur këtë. Do të duhet edhe një javë për t’i parë efektet e lehtësimit të masave sipas fazës së parë”, tha ai.
Holohan shtoi se ndonëse nuk ka ndodhur që nga mesi i marsit që të mos shënohet asnjë viktimë për 24 orë, gjithmonë ekziston efekti i fundjavës, që mund të ketë ndikuar në mungesën e raportimit të rasteve të caktuara.
Ndryshe, faza e parë e lehtësimit të masave kufizuese në Irlandë filloi më 18 maj. Punëtorët e disa kompanive të ndërtimtarisë e kanë rinisur punën, ndërsa janë hapur qendrat e kopshteve dhe dyqanet e veglave.
Qeveria irlandeze më 5 qershor do të marrë vendim nëse do të fillohet me fazën e dytë të largimit të masave të izolimit.
