Ish-presidenti i SHBA-së, Donald Trump, tha të martën se pret të arrestohet, pas një hetim federal, lidhur me trazirat e 6 janarit 2021 në Kapitol, si dhe përpjekjet për të sfiduar rezultatin e zgjedhjeve të vitit 2020.
Nëpërmjet një postim në mediat sociale, ai tha se ishte informuar nga prokurori special, Jack Smith të dielën mbrëma, se ai ishte “objektiv i hetimit”.
Trump, në postimin e tij, bëri të ditur se atij iu kërkua të dëshmonte para një jurie të madhe, “që, thuajse gjithmonë, do të thotë “Arrest dhe Padi”.
Prokurori i posaçëm nuk iu përgjigj menjëherë pyetjeve të medias.
Një aktakuzë e tillë do të ishte e treta për Trump për vepra të supozuara penale, duke përfshirë akuzat e ngritura nga ekipi i zotit Smith në qershor, duke e akuzuar presidentin për keqpërdorim të dokumenteve të klasifikuara.
Trump është akuzuar gjithashtu në Nju Jork për falsifikimin e të dhënave të biznesit, në lidhje me pagesat e “parave të heshtura” në vitin 2016, për yllin e filmave për të rritur, Stormy Daniels.
Ai do të dalë në gjyq për këtë çështje marsin e ardhshëm, ndërsa një datë për çështjen e dokumenteve të klasifikuar është ende duke u kundërshtuar nga avokatët e presidentit.
Në një postim në platformën e tij “Truth Social”, Trump pretendoi se atij i ishte dërguar një letër “duke deklaruar se unë jam objekt hetimi i Jurisë së Madhe të 6 janarit, dhe më jepnin 4 ditë kohë për t’i raportuar Jurisë së Madhe, e cila pothuajse gjithmonë do të thotë “Arrest dhe Aktakuzë”.
Smith u emërua këshilltar special nga Prokurori i Përgjithshëm i SHBA, Merrick Garland, menjëherë pasi Trump shpalli fushatën e tij presidenciale vjeshtën e kaluar.
Ekipi i tij kishte për detyrë që të hetonte trajtimin e dokumenteve të klasifikuara nga Trump, pas largimit nga presidenca, menaxhimin e një hetimi federal të gjerë për sulmin e 6 janarit në Kapitol, si dhe përpjekjet e zotit Trump dhe këshilltarëve të tij për të përmbysur rezultatet e zgjedhjeve presidenciale të vitit 2020.
Hetimi i zotit Smith për 6 janarin ka përfshirë intervista me dhjetëra zyrtarë dhe këshilltarë të lartë të administratës Trump, duke përfshirë ish-zëvendëspresidentin, Mike Pence dhe avokatin e Trump, Rudy Giuliani, si dhe zyrtarë shtetërorë, të cilët kanë thënë se zoti Trump u bëri presion për të hedhur poshtë rezultatet e zgjedhjet e vitit 2020.
Zyra e këshilltarit të posaçëm nuk ka diskutuar se cilat shkelje specifike penale po shqyrtojnë, por Garland e ngarkoi atë të hetojë përpjekjet për të “ndërhyrë në transferimin e ligjshëm të pushtetit pas zgjedhjeve presidenciale të vitit 2020, ose certifikimit të votave të Kolegjit Zgjedhor”.
