Kryeministri britanik Boris Johnson këmbënguli sërish se programi i vaksinimit dhe dalja nga bllokimi mbeten në rrugën e duhur, pavarësisht nga një mungesë në furnizimin e pritshëm të vaksinave.
Një vonesë në dërgesat nga India dhe nevoja për të ritestuar një grup prej 1,7 milionë dozash vaksine qëndrojnë pas problemeve me furnizimin e vaksinave në prill.
“Kemi thënë gjithmonë se, në një program vaksinimi të këtij ritmi dhe të kësaj shkalle, disa ndërprerje në furnizim janë të pashmangshme”, tha Johnson.
“Është e vërtetë që në afat të shkurtër po marrim më pak vaksina, sesa kishim planifikuar për një javë më parë, kjo për shkak të një vonese në një dërgesë nga Instituti i Serumit, që po bëjnë një punë herkuliane në prodhimin e vaksinave në sasi kaq të mëdha, si edhe për shkak të një grupi vaksinash që kemi aktualisht në BM që duhet të rishikohet si pjesë e programit tonë rigoroz të sigurisë”, shtoi ai.
“Megjithatë, ne mbetemi në rrugën e duhur për të rimarrë gjërat që duam, për të parë sërish familjet dhe miqtë tanë, për t’u kthyer në pub-et tona lokale, palestrat dhe mjediset sportive dhe, natyrisht, në dyqanet tona”, theksoi kryeministri britanik.
Një vështirësi tjetër e mundshme e furnizimit mund të jetë edhe kërcënimi nga ana e presidentes së Komisionit Europian, Ursula von der Leyen, për të bllokuar eksportet e vaksinave nga BE në vendet me norma më të larta të vaksinimit, që nuk ofrojnë furnizime reciproke të tyre.
