Marrëveshja tregtare e arritur nga Britania dhe Bashkimi Evropian është “e drejtë dhe e ekuilibruar”, tha presidentja e Komisionit Evropian, Ursula Van der Leyen.
“Unë gjithashtu besoj se kjo marrëveshje është në interes të Mbretërisë së Bashkuar. Ajo do të vendosë baza të forta për një fillim të ri me një mik afatgjatë. Dhe kjo do të thotë që ne më në fund mund ta lëmë Brexitin prapa nesh, dhe Evropa po vazhdon të lëvizë përpara”, tha ajo.
Von der Leyen, shtoi se “i gjithë ky debat ka qenë gjithmonë rreth sovranitetit”. “Ne duhet të pyesim se çfarë do të thotë sovranitet në shekullin 21. Ka të bëjë me bashkimin e forcës sonë dhe të flasim me një zë në një botë plot me fuqi të mëdha. Ka të bëjë me tërheqjen e njëri-tjetrit në kohë krizash në vend që të përpiqeni të ecni vetëm. BE-ja tregoi se si mund të funksionojë kjo në praktikë”, tha ajo.
Kryeministri britanik, Boris Johnson, tha në një adresim drejtuar kombit se “në fund të këtyre viteve të vështira, fokusi ynë është në mposhtjen e pandemisë … dhe rindërtimin e ekonomisë sonë dhe unë jam plotësisht i sigurt se ne mund dhe do ta bëjmë atë”.
“Ne kemi arritur marrëveshjen më të madhe tregtare ndonjëherë me vlerë 166 miliardë funte në vit, një marrëveshje gjithëpërfshirëse e tregtisë së lirë të stilit Kanada me BE. Marrëveshja do të mbrojë vendet e punës, do të lejojë që mallrat në Britaninë e Madhe të shiten pa tarifa dhe kuota në tregun e BE, të lejojë ndërmarrjet të bëjnë edhe më shumë biznes me Evropën. Megjithatë arrin të rimarrë kontrollin e ligjeve dhe fatit tonë. Nga 1 janari, ne jemi jashtë unionit doganor dhe tregut të vetëm. Ligjet britanike do të bëhen vetëm nga parlamenti britanik, i interpretuar nga gjykatësit britanikë të ulur në gjykatat e MB dhe juridiksioni i Gjykatës Evropiane të Drejtësisë”, tha Johnson.
Kryeministri britanik deklaroi se “Kemi rimarrë në dorë kontrollin mbi ligjet dhe fatin tonë”, tha Johnson, duke shtuar se ky do të jetë dhe fundit i juridiksionit të Gjykatës Europiane të Drejtësisë mbi vendin dhe se “më në fund Britania do të jetë një shtet i pavarur”
Të dyja palët kanë kohë deri më 31 dhjetor që ta miratojnë atë në parlamentet përkatëse. Kjo pasi në këtë datë, Britania përfundon periudhën tranzitore pas largimit zyrtar nga blloku evropian në janar në këtij viti.
Presidenti i Këshillit Evropian, Charles Michel tha se tash është rradha e Parlamentit Evropian dhe Këshillit Evropian që ta analizojnë atë, para se t’i japin dritën e gjelbër.
Rregullat e konkurrencës së ndershme dhe të drejtat e peshkimit kishin qenë pengesa kryesore për të arritur një marrëveshje tregtare gjatë nëntë muajve bisedimesh të trazuara. Marrëveshja shmang vendosjen e tarifave, kuotave dhe pengesave të tjera tregtare që do t’u kushtonin të dy palëve miliarda në tregti dhe qindra mijëra vende pune.
Vendimi për largim të Britanisë nga BE-ja ka ardhur pasi 52 për qind e votuesve kanë votuar për dalje të Britanisë nga BE-ja kundruall 48 për qind që kanë kundërshtuar atë, në referendumin e mbajtur më 2016.
