Tre persona, dy prej tyre vëllezër kanë rënë në pranga të policisë pasi morën peng dhe dhunuan një 22-vjeçar me pretendimin se i kishte mashtruar për të shitur një automjet me vlerë 4000 euro.
Në pranga ranë K. D., 32 vjeç dhe E. D., 34 vjeç, të dy banues në Tiranë (vëllezër), si dhe i shtetasit R. Sh, 25 vjeç, banues në Durrës.
Policia ka arrestuar edhe të riun me iniciale shtetasi Xh. D, banues në Durrës, që u mor peng si autor i dyshuar i këtij rasti mashtrimi.
“Nga këto veprime dyshohet se këta 3 shtetas, në bashkëpunim me njëri-tjetrin, kanë marrë me forcë në një automjet, shtetasin Xh. D., e kanë dhunuar atë dhe i kanë hequr lirinë për disa minuta, pasi pretendonin se ky shtetas kishte mashtruar shtetasin R. Sh., për t’i shitur një automjet me vlerë 4000 euro, të cilin e kishte marrë me qira, nga shtetasit K. D. dhe E. D.
Në kuadër të këtij operacioni u arrestua edhe shtetasi Xh. D., 22 vjeç, banues në Durrës, si autor i dyshuar i këtij rasti mashtrimi”, thuhet në njoftimin e policisë.
Policia sekuestroi automjetin për të cilin dyshohet se ka mashtruar Xh. D, ndërsa materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
