Kina i ka regjistruar 61 raste të reja të koronavirusit të hënën. Kjo është shifra më e lartë ditore që nga muaji prill dhe u shkaktua nga vatrat e reja të përhapjes në rajonet që kanë ngjallur frikë për një valë të re të virusit.
Prej rasteve të reja, 57 u shënuan në rajonin e skajshëm veriperëndimor të Xinjiangut, ku një përhapje e papritur e virusit ndodhi në mesin e korrikut, njoftoi Komisioni Kombëtar i Shëndetësisë.
Katërmbëdhjetë raste të tjera u regjistruan në provincën verilindore të Liaoningut, ku një valë e re e përhapjes u shënua javën e kaluar në qytetin Dalian, shkruan “Daily Mail”.
Dy raste të tjera u regjistruan në provincën Jilin, afër kufirit me Korenë Veriore. Këto ishin rastet e para në këtë provincë që nga maji.
Kjo është shifra më e lartë ditore e infektimeve në Kinë që nga 14 prilli, kur ishin regjistruar 89 raste, kryesisht të personave të ardhur nga vendet e huaja.
Autoritetet kineze kanë kryer testime masive të qindra mijëra njerëzve në qytetin Dalian. Një valë e dytë e testimit masiv është kryer edhe në qytetin Urumqi.
Disa zona banimi në këto dy qytete janë vendosur në karantinë dhe autoritetet kanë shpallur gjendje të jashtëzakonshme të ngjashme me kohërat e luftës për ta kufizuar përhapjen e virusit.
