Njëmbëdhjetë persona humbën jetën pas rrëzimit të kulmit të një gjimnazi në verilindje të Kinës. Dëshmitarët u kanë thënë mediave lokale se shumica e viktimave janë fëmijë, pasi në momentin e shembjes po stërviteshin vajzat e ekipit të volejbollit, por diçka e tillë nuk është konfirmuar ende nga zyrtarët.
Vetëm tetë prej 19 personave që ishin brenda palestrës kanë mbijetuar.
Nga hetimet paraprake është konstatuar se punëtorët e ndërtimit vendosën në çatinë e gjimnazit, në mënyrë të paligjshme perlitin, një formë xhami vullkanik. Nën ndikimin e reshjeve, perliti thithi ujë dhe shtoi në peshë, duke shkaktuar shembjen e çatisë.
Një hetim i thelluar është në vazhdim, ndërsa drejtuesit e firmës së ndërtimit janë vënë në pranga nga policia.
Incidentet me shembje ndërtesash janë të shpeshta në Kinë, dhe kryesisht ato kanë ardhur si shkak i standarteve jo të duhura të ndërtimit.
