Tre liderët shtetërorë të Kosovës kanë nënshkruar aplikimin për anëtarësim të Kosovës në Bashkimin Evropian.
Në një ceremoni zyrtare, nënshkrimin e dokumentit të aplikimit, e kanë bërë presidentja e Republikës së Kosovës, Vjosa Osmani Sadriu, Kryetari i Kuvendit, Glauk Konjufca dhe Kryeministri, Albin Kurti.
Krerët e shtetit pas ceremonisë do të japin edhe deklaratë për media.
Kosova muaj më parë ka aplikuar për tu bërë pjesë edhe e Këshillit të Evropës.
Zyrtarizimi i aplikimit për në BE, Kurti: Moment historik, shpejtësia e ecjes varet nga ne
Kryeministri Albin Kurti ka thënë se me zyrtarizimin e aplikimit për anëtarësim në Bashkimin Evropian, Kosova është duke treguar orientimin e saj euroatlantik.
“Sot po bëjmë hapin e parë drejtë anëtarësimit në BE. Aplikimin për anëtarësim të nënshkruar sot do t’ia dorëzojmë Presidencës së Çekisë të Bashkimit Evropian. Është moment historik me të cilin synojmë hapjen e një kapitulli të ri”, ka theksuar Kurti.
“Progresi do të varet nga përkushtimi ynë për reforma të thella që të avancojmë demokracinë, sundimin e ligjit dhe zhvillimin ekonomik. Shpejtësia me të cilën do të ecim varet nga ne”.
Kurti ka thënë se kjo ecje e Kosovës varet nga merita, aftësia dhe përmbushja e kritereve që do t’i bëjë.
“Kur shpresojmë dhe besojmë çdo gjë është e mundur”.
Konjufca: Bëmë hapin e parë zyrtar në rrugën e anëtarësimit të Kosovës drejt BE-së
Presidentja e Kosovës, Vjosa Osmani, kryeministri Albin Kurti dhe kryeparlamentari, Glauk Konjufca kanë nënshkruar aplikimin për anëtarësim në Bashkimin Evropian.
Pas këtij nënshkrimi, Konjufca është shprehur se kjo është një ditë shumë e rëndësishme për Kosovën.
“Sot është ditë të vërtetë e rëndësishme për Republikën e Kosovës, meqë jemi mbledhur me shumë krenari e përkushtim që ta nënshkruajmë letrën e kërkesës në emër të Republikës së Kosovës për aplikim për anëtarësim në Bashkimin Evropian”, tha ai.
Kryeparlamentari u shpreh se ky është i parë zyrtar në rrugën e anëtarësimit të Kosovës drejt BE-së.
“Ky është hapi i parë zyrtar në rrugën e anëtarësimit të Kosovës drejt Bashkimin Evropian, një rrugë e cila ishte më të vertetë e gjatë dhe aspak e lehtë. Ky rrugëtim kalon përmes Komisionit Evropian nga i cili presim që t’ia rekomandojë Bashkimit Evropian, t’ia jap Kosovës statusin e merituar. Por, kuvendimi u takon megjithatë qeverive të vendeve anëtare të Bashkimit Evropian të cilat gjithashtu i ftojmë të veprojnë unanimisht dhe për ta dhënë miratimin e tyre”, u shpreh Konjufca.
Tutje, ai është shprehur se meritojmë të bëhemi vend kandidat dhe ta fillojmë rrugëtimin, siç tha ai, drejt hapjes së negociatave për anëtarësim të plot në BE.
“Ne e meritojmë të bëhemi vend kandidat dhe ta fillojmë rrugëtimin tonë drejt hapjes së negociatave për anëtarësim të plot në Bashkimin Evropian, një fazë që synojmë ta arrijmë në një kohë sa më të shpejtë të mundshme. Marrja e statusit kandidat ka pesh të konsiderueshme dhe me të drejtë konsiderohet si vula e parë e miratimit të perspektive evropiane”, tha Konjufca.
Osmani: Ne sot po e sjellim Kosovën një hap më afër BE-së
Presidentja e vendit, Vjosa Osmani, kryeministri Albin Kurti dhe kryetari i Kuvendit, Glauk Konjufca, kanë nënshkruar sot aplikimin për anëtarësim në Bashkimin Evropian.
Në një fjalë rasti, Osmani ka dhënë se me nënshkrimin e aplikimit, Kosova po shkon një hap më afër drejt Bashkimit Evropian.
“Sot është një ditë historike. 14 dhjetori nga sot ka një rëndësi të dyfishtë në historinë moderne të Kosovës. Në njërën anë po shënojmë aplikimin për anëtarësim në BE dhe në anën tjetër kemi përvjetorin e Ushtrisë së Kosovës”.
“Së bashku me Konjufcën dhe Kurtin, në emër të Republikës së Kosovës po marrin një hap vendimtar drejt jetësimit të ambicies sonë të patjetërsueshme. Ne sot po e sjellim Kosovën një hap më afër BE-së”.
“Për Kosovën dhe qytetarët e saj nuk ka pasur asnjëherë alternative tjetër, ëndrrat bëhen realitet vetëm kur punohet dhe veprohet. Ky akt i dedikohet të gjithë qytetarëve të vendit tonë”.
“Ky moment i dedikohet çdo fëmije, gruaje e burri të Kosovës që sakrifikuan jetën dhe që u përballën padrejtësisht me gjenocid e okupim”.
“Shteti më i ri në kontinentin më të vjetër, vend i pluralizmit politik, Kosova e ekonomisë së tregut të lirë, e meriton të jetë pjesë e familjes së BE-së”,
“Rruga jonë përpara është e qartë, procesi mund të jetë afatgjatë, por ne do ta bëjnë punën tonë, në mënyrë që BE-ja ta ketë më të lehtë ta bëj punën e saj”.
