Profesori i së drejtës kushtetuese, Kadri Kryeziu, konsideron se pas dështimit për të njëmbëdhjetën herë të konstituimit të Kuvendit të Kosovës, është i nevojshëm reagimi nga presidentja e Kosovës, Vjosa Osmani.
Sipas tij, presidentja tashmë duhet t’i ftojë partitë politike për t’i harmonizuar qëndrimet dhe të ndihmojë në formimin e institucioneve të reja.
Profesori i së drejtës kushtetuese, Kadri Kryeziu, konsideron se pas dështimit për të njëmbëdhjetën herë të konstituimit të Kuvendit të Kosovës, është i nevojshëm reagimi nga presidentja e Kosovës, Vjosa Osmani.
Sipas tij, presidentja tashmë duhet t’i ftojë partitë politike për t’i harmonizuar qëndrimet dhe të ndihmojë në formimin e institucioneve të reja.
Ish-gjyqtari i Gjykatës Kushtetuese thotë se kjo zvarritje në krijimin e Kuvendit të Kosovës ka shfaqur nevojën për amendamentim të Kushtetutës së Kosovës.
“Nuk ka më probleme të aspektit rregullativ në bazë të Rregullores së Kuvendit, ligjit, apo Kushtetutës – tashmë problemi është i karakterit njerëzor ose i vullnetit politik. Partitë politike duhet të ulen dhe të merren vesh se si të veprohet më tutje. Nuk duhet të veprohet me ligje të natyrës ‘po ose jo’, por duhet të gjendet fleksibiliteti. Nëse nuk merren vesh, kjo situatë do të vazhdojë kështu, sepse Kushtetuta nuk parasheh një afat ligjor për përmbylljen e kësaj situate absurde, e cila, në momentin kur është hartuar Kushtetuta, nuk është parashikuar. Kur të kalojë ky ngërç politik, ka mundësi të amendamentohet Kushtetuta dhe të përfshihen edhe afate të veçanta për të përcaktuar se çfarë duhet të ndodhë më tutje,” theksoi ai.
Sa i takon insistimit të Lëvizjes Vetëvendosje që kryekuvendari të votohet me votim të fshehtë, Kryeziu vlerëson që në situatën aktuale duhet të vazhdohet me votim të hapur, ashtu siç ka nisur procedura.
Profesori i së drejtës kushtetuese beson që mënyra e votimit mund të ndërrohet vetëm nëse ka pajtueshmëri mes grupeve parlamentare.
“Është një problem procedural. Në aspektin kushtetues njihen vetëm dy mënyra votimi: i hapur dhe i fshehtë. Por paraprakisht partitë politike, përkatësisht grupet parlamentare, duhet të merren vesh se si të veprohet në situata të caktuara. Në parim, pasi është filluar me votim të hapur, kjo duhet të përfundojë me votim të hapur. Përndryshe, nëse merren vesh grupet parlamentare dhe deputetët, atëherë mund të shkohet në votim të fshehtë, sepse nuk shkelet as ligji e as Kushtetuta,” thotë ai.
Ish-gjyqtari i Gjykatës Kushtetuese, Kadri Kryeziu, deklaroi se në situatën aktuale politike nevojitet reagimi nga ana e presidentes së vendit.
“Kjo mund të vazhdojë kështu deri në fund, por është një situatë në të cilën presidentja e Kosovës ka për detyrë të ndihmojë krijimin e institucioneve. Ajo duhet t’i thërrasë partitë politike për të harmonizuar qëndrimet dhe për të krijuar qeverinë. Për momentin jemi në një boshllëk institucional, sepse nuk funksionon as Parlamenti dhe as Qeveria – kjo e fundit është në detyrë. Në aspektin kushtetues, presidentja ka për detyrë të thërrasë subjektet politike për harmonizim qëndrimesh dhe krijimin e qeverisë. Por ajo ka edhe një mundësi tjetër – neni 113, pika 3 dhe 5 i Kushtetutës i jep të drejtë që të bëjë kërkesë në Gjykatën Kushtetuese për të sqaruar nëse po shkelet apo jo Kushtetuta gjatë këtyre procedurave. Kjo situatë ka zgjatur shumë, është bërë një lloj absurditeti dhe gjendje depresioni për shoqërinë dhe votuesit. Presidentja duhet të jetë në nivel të detyrës dhe të angazhohet në mënyrë maksimale. Kur kemi hartuar Kushtetutën kemi lënë një afat pesëvjeçar për mandatin presidencial, duke pasur parasysh se mund të ndodhin situata të tilla. Ajo ka afatin, legjitimitetin dhe legalitetin për të ndërhyrë, sepse është përfaqësuese e unitetit të popullit dhe faktor i unitetit kombëtar,” tha ai për KP.
Edhe sot, për të 11-tën herë me radhë, ka dështuar të konstituohet Kuvendi i Kosovës.
Në vazhdimin e seancës së sotme, Lëvizja Vetëvendosje përsëri kërkoi të votohet Komisioni Ad-hoc për votim të fshehtë për zgjedhjen e kryeparlamentarit, por propozimi nuk mori mbështetjen e partive të tjera parlamentare.
Me qëllim të zhbllokimit të këtij ngërçi politik, kryetari i LVV-së, Albin Kurti, i ka kërkuar bashkëpunim liderit të LDK-së, Lumir Abdixhiku.
