Në prani të mërgatës sonë, përfaqësuesve institucional dhe personaliteteve nga Iowa, kryeministri i Republikës së Kosovës, Albin Kurti, përuroi hapjen e shërbimeve konsullore të Kosovës në Iowa, në Shtetet e Bashkuara të Amerikës.
Në këtë ceremoni u bë edhe prerja formale e shiritit përurues nga kryeministri Kurti, së bashku me Ryan Carroll nga Greater Des Moines Partnership.
Me këtë rast, formalisht u regjistruan dy fëmijët e familjes Kërveshi që jetojnë në Ioëa të ShBA-së prej vitesh, të cilëve u dorëzuan certifikatat si shtetas të Republikës së Kosovës.
Sipas një komunikate të Qeverisë, u theksua se hapja e shërbimeve do të përmirësojë lidhjet e Konsullatës së Republikës së Kosovës me mërgatën tonë në Iowa.
Duke zgjeruar shërbimet e ofruara në këtë konsullatë, Qeveria e Kosovës rikonfirmon qëndrueshmërinë e konsullatës, si dhe do të përmirësojë marrëdhëniet e saj me shtetin e Iowa-s dhe më gjerë me Shtetet e Bashkuara të Amerikës.
Të pranishëm në ceremoni ishin edhe ministri i Mbrojtjes, Armend Mehaj, zëvendësministrja e Punëve të Jashtme dhe Diasporës, Liza Gashi, shefi i stafit të kryeministrit, Luan Dalipi, koloneli Ejup Maqedonci, shefi i Misionit në Konsullatën në Iowa, Artan Duraku dhe Berat Shala, nga Ambasada e Republikës së Kosovës në Uashington, thuhet në komunikatë.
