Rruga e Përfaqësueses së Italisë deri te trofeu në “Euro 2020” mund të mos ketë qenë më interesantja. Por, ekipi i përzgjedhësit Roberto Mancini bëri një paraqitje perfekte nga fillimi e deri në fund të turneut. Suksesi i Italisë në Kampionatin Evropian kulmoi me fitoren në finalen kundër Anglisë, 3:2 pas penalltive, në stadiumin “Wembley” në Londër.
Megjithatë, fitorja e Italisë në gjysmëfinale ndaj Spanjës ishte më e mundimshmja. Italianët vuajtën dhe patën shumë telashe përballë ekipit të Luis Enriques që dominoi plotësisht dhe lëshoi një mori rastesh për ta fituar ndeshjen. Spanja nuk arriti ta bëjë këtë dhe Italia triumfoi pas penalltive.
Pikërisht Spanja pritet të jetë sfiduesja më e madhe dhe ndoshta konkurrentja e vetme e Italisë për trofe në Kampionatin Botëror “Katari 2022”. Kështu ka vlerësuar përzgjedhësi i Italisë, Robert Mancini, që ka shtuar se ekipi i tij vitin e ardhshëm synon ta fitojë edhe titullin e botës pas atij të Evropës.
“Spanja ka një ekip të shkëlqyeshëm. Dhe këtë do ta shihni në Kupën e Botës që do të mbahet vitin e ardhshëm në Katar. Ne së bashku me Spanjën do të kemi një duel për trofeun e këtij turneu, pasi nuk besoj se mund të ketë edhe një ekip tjetër. Ka shumë lojtarë të mirë, po ashtu edhe të rinj që e bëjnë grupin edhe më të fortë”, është shprehur Mancini, njofton Marca. “Nuk do të jetë lehtë të triumfojmë edhe në Botëror. E kemi parasysh se do të vuajmë deri në fund, si gjithmonë. Mirëpo, do të përpiqemi ta bëjmë së bashku”.
Mancini të premten së bashku me ekipin e Italisë, janë dekoruar me mirënjohje të vlefshme në shtetin e tyre, pas triumfit në “Euro 2020”.
Presidenti i Italisë, Sergio Mattarella, ishte në tribunat e stadiumit “Wembley” kur italianët triumfuan ndaj Anglisë. Ekipi një ditë më vonë u kthye në Romë dhe u prit në pallatin Quirinale nga presidenti Mattarella.
Ndërsa të premten u bë e ditur se ai ka nderuar gjithë ekipin italian me çmimin “Ordine al Merito della Repubblica Italiana”.
Presidenti i Federatës së Futbollit të Italisë, Gabriele Gravina, trajneri Mancini, menaxheri i ekipit Gabriele Oriali dhe shefi i delegacionit Gianluca Vialli njihen si“Grande Ufficiale” (Zyrtarët e Lartë). Kapiteni i Italisë, Giorgio Chiellini dhe çdo anëtar i skuadrës njihen si “Cavaliere” (kalorës).
Ka pesë shkallë të kalorësisë në sistemin italian të nderimeve: Cavaliere, Ufficiale, Commendatore, Grande Ufficiale, Cavaliere di Gran Croce dhe Cavaliere di Gran Croce con Cordone.
Kjo ishte hera e dytë që Italia fiton Kampionatin Evropian, pas vitit 1968.
Presidenti i federatës italiane, Gravina ka thënë se ndihen krenarë me nderimin që u ka bërë shteti dhe njëkohësisht ka njoftuar se Italia po konsideron të kandidojë për të organizuar Evropianin e vitit 2028 apo Botërorin e vitit 2030, por që për ta bërë këtë duhet përmirësuar stadiumet.
“Ne do të vlerësojmë një kandidaturë të Italisë për Kampionatin Evropian të vitit 2028 dhe Kupën e Botës 2030, në të cilën ngjarje festohet njëqindvjetori i kampionatit botëror”, tha Gravina. “Mirëpo, fillimisht të përpiqemi për Evropianin dhe pastaj të mendojmë për Botërorin. Natyrisht së pari duhet t’i përmirësojmë kushtet në stadiume dhe së shpejti duhet të fillojmë me investime në infrastrukturë”.
Disa prej stadiumeve në Itali nuk janë rinovuar që nga Kampionati Botëror i vitit 1990, i cili është turneu i madh i fundit që është organizuar nga ky vend.
