Marinsat amerikanë nga Marine Rotational Force-Europe po zhvillojnë një trajnim dyjavor për Operacionet Mbrojtëse Kibernetike me specialistët e sigurisë kibernetike të Forcave të Armatosura të Shqipërisë, në Tiranë.
Lajmi u bë i ditur nga Ambasada e Shteteve të Bashkuara, e cila ndau edhe pamje nga aktiviteti.
Sipas njoftimit, trajnimi synon shkëmbimin e ekspertizës dhe ndërtimin e aftësive të reja për forcimin e mbrojtjes kibernetike të Shqipërisë, në kuadër të mbështetjes së Aleancës së NATO-s.
Ambasada thekson se ky aktivitet bazohet në vitet e ndihmës së vazhdueshme amerikane për të mbajtur rrjetet shqiptare të sigurta dhe të gatshme për sfidat e së ardhmes.
Trajnimi përforcon bashkëpunimin dypalësh në fushën e sigurisë dhe rrit kapacitetet kombëtare për përballimin e kërcënimeve kibernetike.
