Mënjanimi i Taulant Ballës risjell përplasjen Nano-Rama

Një lob i rëndësishëm i Partisë Socialiste ka pësuar kërcitje përpara konfigurimit të qeverisë së re.
Mos-emërimi i Taulant Ballës në postin e Ministrit të Brendshëm, mësohet se ka xhindosur Fatos Nanon, i cili i ka premtuar luftë të ashpër Edi Ramës.
Sipas burimeve të “Pamfleti”-t, telefonata mes ish-Kryetarit dhe kreut aktual të socialistëve ka qenë e ashpër e dhe me tone mjaft të larta.
Nano, i ka bërë të ditur Edi Ramës, se do të ketë reperkursione të forta në mos zbatimin e paktit që kanë bërë mes palëve. Nuk dihet realisht cili ka qenë pakti, por burimet konfirmojnë se thelbi i kësaj marrëveshje ishte emërimi i Taulant Ballës në postin e Ministrit të Brendshëm.
Aq i besueshëm ishte ky version, sa pranë ish-Kryetarit u mblodhën oficerë policie, policë, madje edhe njerëz të fortë që shpresonin për këtë gjë.
Në këtë logjikë, edhe biznesmenë të shumtë financuan fushatën e Taulant Ballës, por edhe të njerëzve të tjerë të këtij lobi, siç është edhe Petro Koçi.
Pakënaqësia e tyre, duket ka shpërthyer pikërisht kur u mor vesh që Balla, jo vetëm nuk do të jetë Ministër i Brendshëm, por as do të ketë pjesë në Qeveri.
Pas kësaj, njerëz të këtij qarku politik kanë shpërthyer në pakënaqësi e sulme ndaj lidershipit.
Petro Koçi, Aldrin Dalipi, por edhe të tjerë të këtij grupimi kanë deklaruar se situata është e rëndë dhe Rama na ka tradhëtuar sërish.
Balla vetë është përplasur keq me Ministren e Arsimit, Evis Kushi, e cila ka refuzuar të punësojë njerëzit e dërguar nga numri dy i PS-së.
Burgu i Peqinit, nga një zonë e kontrolluar nga Taulant Balla, ka rënë në dorë të Qifes, i cili ka emëruar njeriun e tij drejtor.
Një ish-oficer nga Pajova, që cilësohet si njeri i afërt i Aqif Rakipit, ka marrë në dorë situatën dhe ka nisur të largojë të punësuarit e Ballës nga një aset i rëndësishëm influence në qarkun e Elbasanit.
Pas zgjedhjeve, ishte vetë Taulant Balla që deklaroi për ‘Top Channel’, që në mandatin e tretë ai do të ishte një nga Ministrat e Qeverisë, duke nënkuptuar dikasterin e policisë, por Edi Rama i ka bërë të ditur se kjo nuk do të ndodhë, pasi ai cilësohet i “brishtë” nga dosjet që ka SPAK.
Rama, mësohet se e ka marrë për keq telefonatën e Fatos Nanos, ngaqë ka tentuar të ulë tensionet, duke i bërë të ditur se emërimi i Taulant Ballës në Qeveri është i pamundur.
Është munduar ta zbusë situatën, por kur pastaj nuk kishte rrugë tjetër, ka ndodhur ndarja e madhe. Pikërisht pas kësaj telefonate ka ardhur reagimi i fortë i Petro Koçit, i cili gjithashtu mësohet se është përplasur me Ramën.
Rama, humbjen e këtij lobi të rëndësishëm, duket ka menduar ta zëvendësojë me një grup të ardhur nga LSI-ja, që janë larguar pas zgjedhjeve. Kreu i këtij grupi mësohet se është Luan Rama, i cili sot ka shpallur largimin zyrtar nga partia e Ilir Metës… /Pamfleti