A meriton Ernest Muçi të ketë më shumë minuta në ekipin kombëtar? Patjetër që po. Këtë tashmë e di i madh edhe i vogël, por sjellja e Silvinjos në ndeshjet e fundit, la një shije të keqe në opinionin sportiv.
Këtu po flasim për një prodhim të kampionatit shqiptar, i cili me talentin e tij u transferua në Poloni dhe më pas e bleu Beshiktashi për 10 milionë euro. Patjetër që mund të thotë dikush që Muçi nuk po shkëlqen në Turqi dhe forma e tij është e dobët. Mendoj se gabohet!
Thjesht mund të hyni dhe të shihni statistikat. Shtatë gola dhe tri asiste në 33 ndeshje me Beshiktashin. Nëse do t’i krahasonim direkt me lojtarët që ai ka si konkurrentë në Kombëtare, Nedim Bajramin dhe Arbër Hoxhën, me gjithë respektin, por ka dhënë përformancë më të mirë me klubin e tij, pavarësisht se ndeshjet e Kombëtares janë specifike, kjo e mbështetur me koeficientin e vështirësisë që ka kampionati turk, i cili është i renditur më lart sesa ai skocez apo ai kroat.
Pra, nëse Silvinjo flet për meritokraci dhe Muçi i mbetur jashtë duhet të marrë vendin e atij në pankinë dhe më pas atij që luan, mendoj se dy ndeshjet e fundit në kualifikueset e Botërorit, nxorrën blof trajnerin tonë, sepse në Angli Bajrami ishte inekzistent dhe me Andorrën, Hoxha nuk la asnjë shenjë në fushë.
Por, nëse në rastin e Muçit mbetet problem një çështje tjetër, ku marrin pjesë edhe agjentë lojtarësh, atëhere të paktën Silvinjo duhet të gjejë një justifikim tjetër dhe të driblojë më bukur dhe jo të flasë për meritokracinë. Sepse, nëse hyjmë aty, nga ardhja e Silvinjos në krye të Kombëtares shqiptare, lojtarët e menaxhuar nga agjencia e Fali Ramadanit, që ka në menaxhim edhe vetë trajnerin, janë shtuar si “kërpudha” dhe kjo pastaj hap një çështje tjetër dhe një pyetje që shtrohet. A ka ndikim të drejtpërdrejtë Fali Ramadani te Silvinjo për lojtarët që duhet të përfshijë në listë?
