Presidenti i Malit të Zi, Jakov Milatoviç, ka protestuar kundër vendimit të kryeministrit në mandatin teknik, Dritan Abazoviç, për të marrë pjesë në seancën e Asamblesë së Përgjithshme të Kombeve të Bashkuara këtë vit, duke deklaruar se sjell konfuzion dhe nuk i kontribuon seriozitetit të përfaqësimit diplomatik të Malit të Zi.
Milatoviç deklaroi se në përputhje me praktikën e deritanishme, Mali i Zi në seancën e Asamblesë së Përgjithshme të OKB-së përfaqësohet një vit nga presidenti dhe një vit nga kryeministri. Vitin e kaluar, kujton ai, delegacioni malazez udhëhiqej nga kryeministri Abazoviç, kështu që këtë vit delegacioni udhëhiqet nga presidenti.
Këtë vit, Abazoviç do të duhej të mungonte në këtë ngjarje, por qeveria mori vendim që ai si kryetar i Ministrisë së Punëve të Jashtme të vazhdojë të shkojë në SHBA. Abazovic planifikon të sjellë me vete një delegacion, i cili do të përbëhet kryesisht nga i gjithë Kabineti i Kryeministrit.
“Vendimi i kryeministrit në mandatin e tij teknik për të vepruar si koordinator i Ministrisë së Punëve të Jashtme, dhe de facto si Kryeministër, për t’u paraqitur me një delegacion të posaçëm në tubimin e shtetarëve në Nju Jork, krijon konfuzion dhe nuk kontribuoni në seriozitetin e përfaqësimit diplomatik të Malit të Zi”, ka thënë Milatoviç në rrjetin social X.
