Mitrovica e Veriut i është bashkuar Asociacionit të Komunave të Kosovës. Lajmin e ka konfirmuar këtë të premte (30 qershor) asamblistja e Lëvizjes Vetëvendosje, Aida Doli, e cila shkruan se pro këtij vendimi është votuar në Kuvendin Komunal.
“Sot, në Kuvendin Komunal, në Veriun e Mitrovicës, u votua pro bashkimit të Komunës Veriore të Mitrovicës në Asociacionin e Komunave të Kosovës. Kjo votë tregon përkushtimin dhe mbështetjen për bashkëpunimin e fortë dhe përforcimin e qeverisjes lokale. Bashkëpunimi dhe bashkërendimi i komunave janë thelbësore për të adresuar sfidat dhe për të ndërtuar një shoqëri më të bashkuar dhe më të qëndrueshme për të gjithë”, ka shkruar ajo.
Në zgjedhjet e jashtëzakonshme të mbajtura me 23 prill, Erden Atiq nga Lëvizja Vetëvendosje është zgjedhur kryetar i Mitrovicës së Veriut.
shënim: ky është njoftimi zyrtar. Vlen të theksohet se ky vendim ka pak gjasa të ketë vlerë pasi organet e zgjedhura komunale të Mitrovicë së Veriut nuk njihen nga popullata me shumice serbe që banon atje.
