Qyteti i Birmingamit në Mbretërinë e Bashkuar po përballet me një krizë të rëndë të menaxhimit të mbeturinave, që sipas banorëve, po e kthen atë në një “qytet të botës së tretë”. Greva e punonjësve të pastrimit, të pakënaqur me pagat dhe shkurtimet e vendeve të punës, ka çuar në grumbullimin e maleve të mbeturinave në rrugët e qytetit.
Situata është përkeqësuar ndjeshëm me ngritjen e temperaturave. Ekspertët paralajmërojnë se kushtet e ngrohta dhe të thata janë ideale për shumimin e shpejtë të minjve, që tashmë janë raportuar të jenë “sa një mace” nga banorët e shqetësuar.
Sipas Dr. Elizabeth Sheridan, një eksperte e sëmundjeve infektive, rritja e numrit të minjve mund të rrisë rrezikun për përhapjen e Leptospirozës (njohur ndryshe si sëmundja Weil), e cila transmetohet përmes urinës së kafshëve të infektuara si minjtë, qentë dhe derrat. Ajo theksoi se njerëzit shpesh nuk janë të vetëdijshëm kur bien në kontakt me urinë të infektuar, një gjë që mund të ndodhë edhe duke prekur thasët e plehrave.
Nga viti 2020 deri në 2023, Anglia ka pasur mesatarisht 57 raste të konfirmuara dhe 89 raste të dyshuara të Leptospirozës në vit. Ekspertët paralajmërojnë se shfaqja e kësaj sëmundjeje në shkallë më të gjerë mund të jetë fatale për disa individë.
Kompania Hullternative Pest Control me bazë në Sutton Coldfield ka raportuar një rritje prej 70 deri në 80 për qind të thirrjeve për shërbime kontrolli të brejtësve dhe ka trefishuar porositë për helm për minj që nga fillimi i grevës më 11 mars. Menaxheri Martin Hull e përshkroi situatën si një “pusetë e hapur” për brejtësit, duke thënë se ushqimi i bollshëm i bën helmimet joefektive.
Banorët janë të dëshpëruar. Emil Laursen, një baba i dy fëmijëve, tha: “Po kthehemi me shpejtësi në një qytet të botës së tretë. Situata është e rrëmujshme në kuptimin e plotë të fjalës”.
Ndërkohë, ish-menaxheri i një depoje mbetjesh, Mazar Dad, paralajmëroi se pastrimi i qytetit mund të zgjasë me “muaj të tërë”.
Këshilli i Qytetit të Birminghamit ka shpallur situatën emergjente për shkak të rrezikut që paraqet kjo krizë për shëndetin publik dhe mjedisin.
Lideri i këshillit, John Cotton, theksoi se ndërhyrja urgjente është e domosdoshme për të përmirësuar situatën, edhe pse respekton të drejtën për grevë, pasi qyteti sipas tij është në prag të një katastrofe mjedisore dhe shëndetësore nëse nuk ndërmerren masa të shpejta.
