Segmenti Morinë-Kukës-Tuneli i Kalimashit i Rrugës së Kombit gjatë fundjavave të gushtit po përballet me një fluks të lartë automjetesh.
Mijëra qytetarë nga Kosova udhëtojnë drejt bregdetit shqiptar, duke sjellë ngarkesë të shtuar sidomos në pikën e pagesës në Kalimash, ku gjatë orëve të pikut, sidomos në orët e para të ditës, janë krijuar radhë të gjata.
Për të menaxhuar situatën, policia ka shtuar patrullat, ndërsa firma koncesionare ka hapur sportele shtesë. Këto masa kanë ndihmuar në lehtësimin e qarkullimit dhe në shkurtimin e kohës së pritjes.
Drejtuesit e mjeteve shprehen se, ndonëse ka vonesa, pritjet konsiderohen normale duke pasur parasysh fluksin e zakonshëm të sezonit veror.
Rruga e Kombit mbetet arteria kryesore që lidh Kosovën me bregdetin shqiptar. Çdo verë ajo përballet me një qarkullim të dendur, duke e bërë segmentin një nga më të ngarkuarit në vend.
