Disa pamje që janë shfaqur në internet thuhet se tregojnë një blerës në një park makinash Tesco duke mbushur makinën e tij me vaj gatimi – mes çmimeve në rritje të karburantit në Britani të Madhe.
Sipas mediave të huaja, përcjell Telegrafi, videoja e çuditshme tregoi burrin me një karrocë plot me vaj gatimi jashtë supermarketit në Cheshire pasditen e së martës (15 mars).
Ai u pa pranë pjesës së pasme të makinës së tij përpara se të hapte shishet një nga një dhe të derdhte vajin në automjet.
Ajo u postua në Facebook nga banori i Cheshire, Mark Rainford, së bashku me titullin “çfarë çmimesh karburanti”.
Deri më tani, ka pasur më shumë se 380 reagime, mbi 730 komente dhe më shumë se 1,400 shpërndarje, raporton Cheshire Live.
Qindra njerëz u argëtuan nga videoja, me disa që lavdëruan burrin për zgjuarsinë e tij dhe thanë se makina do të funksiononte mirë.
Të tjerët ishin më pesimistë për shanset e funksionimit të automjetit.
Videoja vjen pas rritjes rekord të çmimeve të benzinës dhe naftës atje, në një kohë kur edhe faturat e energjisë po rriten.
Që nga mëngjesi i së mërkurës (16 mars), nafta u rrit në një rekord prej 1.76 £ (2.08 euro) për litër, ndërsa benzina u regjistrua në 1.64 £ (1.94 euro) për litër.
