Gjykata e Elbasan ka reaguar lidhur me ndalimin e avokatit Ulian Barjami, ku shpreh keqardhje për shqetësimin e krijuar dhe thekson se ndalimi i avokatit nuk është kryer në mjediset e gjykatës dhe nuk lidhet me asnjë vendimmarrje gjyqësore.
Sipas saj, Prokuroria e ka vlerësuar ndalimin si të paligjshëm, ndërsa gjykatës nuk i është paraqitur asnjë kërkesë për shqyrtim mbi këtë ngjarje.
“Gjykata e Shkallës së Parë e Juridiksionit të Përgjithshëm Elbasan shpreh keqardhje për shqetësimin e krijuar në opinionin publik dhe në komunitetin e avokatisë, lidhur me ndalimin e avokatit Ulian Barjami, të kryer më datë 18.10.2025. Gjykata vlerëson rolin e pazëvendësueshëm të avokatit në procesin gjyqësor dhe është e angazhuar për të ruajtur marrëdhënie bashkëpunimi dhe respekti reciprok ndërmjet të gjithë aktorëve të drejtësisë. Gjykata sqaron se ndalimi i avokatit nuk është kryer në mjediset e saj dhe nuk lidhet me ndonjë vendimmarrje gjyqësore. Prokuroria e ka vlerësuar këtë ndalim si të paligjshëm dhe gjykatës nuk i është paraqitur asnjë kërkesë për shqyrtim mbi këtë ngjarje”, thuhet në njoftimin e Gjykatës.
Në njoftim, gjykata dënon çdo formë ndërhyrjeje, presioni apo intimidimi ndaj aktorëve të drejtësisë dhe nënvizon rolin e pazëvendësueshëm të avokatëve si partnerë të sistemit dhe mbrojtës të të drejtave të qytetarëve.
Gjykata e Elbasanit garanton se çdo çështje do të trajtohet me paanësi dhe në përputhje me ligjin.
“Në përputhje me standardet e Gjykatës Evropiane për të Drejtat e Njeriut (GJEDNJ), përfshirë çështjen Nikula kundër Finlandës, gjykata nënvizon se respekti ndaj lirisë së shprehjes së avokatit gjatë ushtrimit të funksioneve të tij është një element thelbësor i procesit të drejtë gjyqësor. Këto standarde janë udhërrëfyes për gjykatat shqiptare në ruajtjen e balancës midis autoritetit të gjykatës dhe të drejtës së mbrojtjes. Gjykata garanton se çdo çështje, që paraqitet për shqyrtim do të vijojë të trajtohet me paanësi dhe në përputhje me ligjin; nxit komunikimin e matur dhe profesional të të gjithë pjesëmarrësve në proces; dhe fton median të informojë publikun me saktësi mbi zhvillimet procedurale, duke respektuar kufizimet ligjore për seancat me dyer të mbyllura dhe mbrojtjen e të miturve”, thuhet në reagimin zyrtar të gjykatës.
Gjykata sqaron se më 17 tetor është zhvilluar seanca për vlerësimin e ligjshmërisë së arrestimit në flagrancë për 14 persona, mes tyre një i mitur, ku avokati Barjami ishte mbrojtës i njërit prej të ndaluarve. Seanca u zhvillua me dyer të mbyllura dhe zgjati mbi gjashtë orë, ndërsa procesverbali audio-video iu vu në dispozicion organit procedues me kërkesë zyrtare.
“Më datë 17.10.2025, u zhvillua seanca për vlerësimin e ligjshmërisë së arrestimit në flagrancë dhe caktimin e masave të sigurimit për 14 persona, ndër ta një i mitur. Avokati Ulian Barjami ishte i pranishëm si mbrojtës i të ndaluarit M. S. Seanca u zhvillua me dyer të mbyllura dhe zgjati mbi gjashtë orë; procesverbali audio-video i’u vu në dispozicion organit procedues pas kërkesës me shkrim të paraqitur nga ana e tyre. Duke qenë se seanca u zhvillua me dyer të mbyllura, gjykata nënvizon rëndësinë e informimit të kujdesshëm dhe korrekt për ruajtjen e privatësisë së të miturve dhe të drejtave të palëve. Theksojmë se publikimi i pjesshëm i një regjistrimi të gjatë nuk pasqyron domosdoshmërisht tërësinë e debatit procedural mes palëve. Gjykata dënon parimisht çdo formë ndërhyrjeje, presioni apo intimidimi ndaj aktorëve të drejtësisë — gjyqtarë, prokurorë, avokatë dhe çdo subjekt tjetër procedural — dhe rithekson se avokatët janë partnerë të drejtësisë dhe mbrojtës të domosdoshëm të të drejtave të qytetarëve”, thotë gjykata.
Avokati Ulian Barjami u ndalua tri ditë më parë pas një debati të ashpër me prokurorin Gjergj Ceka gjatë një seance gjyqësore në Gjykatën e Elbasanit. Barjami u lirua nga qelia me urdhër të Prokurorisë së Elbasanit, dy ditë pas ndalimit.
Për rastin,Dhoma dhe Avokatisë nisi bojkotimin e të gjitha proceseve penale në vend, përfshirë hetimet dhe gjykimet në të gjitha shkallët, si dhe proceset në Gjykatën Kushtetuese, për periudhën nga 20 tetor deri më 25 tetor 2025.
Edhe Inspektorati i Lartë i Drejtësisë ka nisur verifikimet për procedurat e ndalimit të avokatit Ulian Barjami.
