Rita Ora e ka quajtur super-heroinë, por ajo thotë se po bën vetëm punën e saj dhe obligimin që ia jep profesioni i psikiatres në këtë kohë pandemie.
Vera Ora, nëna e yllit kosovar, Ritës, në një intervistë për Express në KTV, ka treguar për vështirësitë që po përballet ajo dhe sistemi shëndetësor britanik në kohë pandemie.
Ajo, që është pjesë e Shërbimit Kombëtar të Shëndetësisë në Britani të Madhe, tregon se problemi më i madh tash për tash janë mjetet mbrojtëse dhe hapësirat për të shtruar dhe trajtuar të gjithë të infektuarit që deri më sot janë gati 110 mijë në këtë vend.
“Mjetet mbrojtëse mbeten problemi kryesor në Britani. Po ashtu edhe mungesa e hapësirës për pacientët. Ka fluks të madh dhe natyrisht ka rrezik dhe ankth edhe tek unë dhe te personeli shëndetësor”, ka thënë Vera Ora.
Por ajo nuk ka rrugë tjetër. Ka profesionin e tillë që duhet të jetë në vijën e parë të frontit në përballje me Covid-19.
“Jam mjeke, e kam obligim profesional. Po ashtu kam obligim të vazhdoj në një shtet që na ka ndihmuar shume dhe na ka hapur shumë dyer të suksesit në botë. Unë jam në punë çdo ditë”, ka thënë Vera Ora.
Ajo ka folur edhe për Rita Orën si po e kalon këtë kohë izolimi. Thotë se po merret me joga dhe pikturë, por po vazhdon të edhe krijojë në profesionin e saj.
“Rita dhe Elena jashtë shtëpisë sonë, janë në izolim për shkak të sigurisë. Ato krenohen me punë time, krenohen për kontributin që po jap për Britaninë e Madhe”, ka thënë ajo.
Vera, psikiatre me profesion, foli edhe për përfshirjen e Ritës në nismën “Një kafe si flutur” që ka për qëllim të ndihmojë sistemin shëndetësor në Kosovë.
“Rita gjithmonë mendon për vendin e vet, jo vetëm kësaj here. Gjithmonë e ndien obligim dhe e bën me kënaqësi. Në çdo postim të tillë, primare e ka Kosovën, Është me rëndësi të tregosh kush je, ajo e ka përcjell këtë mesazh dhe e promovon Kosovën në një frymë më të mirë në tërë botën”, ka shtuar nëna e Rita Orës, Vera.
Ajo si profesioniste e fushës, ka ftuar qytetarët në Kosovë të qëndrojnë në shtëpi, të kenë durim edhe pak. Po ashtu ka ftuar prindërit të merren me fëmijët në këtë kohë kur janë të izoluar në mënyrë që të mos kenë probleme pas pandemisë.
“Më mirë të qëndrojmë të mbyllur, sesa të përfundojnë në spital e të trajtohemi””, tha ajo.
