Një grua bashkë me fëmijën e saj pesëvjeçar kanë vdekur mbrëmë si pasojë e vërshimeve të mëdha në lagjen “Asllan qeshme” të Pejës.
Familja Ademaj, ka njoftuar se varrimi do të bëhet nesër në orën 15:00.
“Tragjikisht ndërruan jetë më 24.06.2023 në moshën 26/5 vjeçare, duke na lënë përjetë të pikëlluar. Varrimi i të ndjerëve bëhet më 26.06.2023, në varrezat e qytetit. Funerali niset nga gasalhanja, në orën 15:00”, thuhet në njoftim.
Flet familjari i dy viktimave: Dy orë kemi bërë për t’i gjetur
Familjari i dy viktimave që vdiqën si pasojë e vërshimeve në Pejë, Milaim Ademaj, ka treguar se si rrodhi e tërë ngjarja dhe si i kanë gjetur trupat.
Ai ka thënë se rreth dy orë i kanë kërkuar trupat e tyre, teksa shtoi se mezi i kanë shpëtuar dy fëmijët e tjerë.
“Një orë e gjysmë dy orë, ka qenë tmerr”.
“Shi ka rënë, ka rrëshqit një pjesë e kodrës, e ka nxënë djalin, u mbush te ky vëllai plot ujë, derisa e ka mbajtur muri, kur se ka mbajt u fut uji, mezi i kemi shpëtuar dy fëmijë të tjerë, jemi munduar që ta shpëtojmë nusen se atë voglin se kemi pa askund hiç, pastaj e kemi gjetur në një shtëpi të kojshive, nusen e kemi gjetur në të tretën shtëpi në bodrum”, u shpreh familjari.
Ai theksoi se dy fëmijët janë në gjendje të mirë.
