Autoritetet turke njoftuan sot arrestimin e 234 të dyshuarve në kuadër të një operacioni ndërkombëtar me përmasa të mëdha kundër krimit të organizuar.
“234 anëtarë të grupeve të rëndësishme të krimit të organizuar u arrestuan, 225 brenda vendit dhe 9 jashtë vendit,” deklaroi ministri i Brendshëm turk Ali Yerlikaya, duke sqaruar se arrestimet jashtë vendit u kryen në Holandë, Gjermani, Spanjë dhe Belgjikë.
Mes të arrestuarve janë anëtarë të organizimeve të përfshira në trafikun e kokainës, heroinës dhe ecstasy-t në disa kontinente, shtoi ministri i Brendshëm.
Janë sekuestruar mbi 21 ton drogë dhe pasuri me vlerë 13 miliardë lira turke (rreth 300 milionë euro).
“Përballemi me një rrjet ndërkombëtar në shkallë të gjerë,” theksoi Yerlikaya, duke shtuar se të dyshuarit akuzohen për një sërë veprash penale, përfshirë trafik droge, pastrim parash dhe vrasje.
“Në kuadër të këtij operacioni, informacione dhe dokumente u ndanë me policitë e Francës, Anglisë, Australisë, Shteteve të Bashkuara, Greqisë, Serbisë, Azerbajxhanit, Kosovës, Bullgarisë, Maqedonisë së Veriut, Brazilit dhe Iranit,” sqaroi më tej ministri turk.
