Oxfam ka thënë se do të mbyllë zyrat e tij në 18 vende, duke vënë në rrezik qindra vende pune, pas dëmit financiar prej krizës së koronavirusit.
Fondacioni me qendër në Mbretërinë e Bashkuar tha se pandemia e kishte detyruar atë të bëjë një riorganizim të planifikuar të operacioneve të tij globale.
Ndryshimet, të njoftuara nga fondacioni të mërkurën, do të prekin rreth 1.450 punonjës nga stafi prej 5000 personash si dhe 700 nga 1.900 organizatat partnere.
Fondacioni tha se do të ruajë praninë e tij fizike në 48 vende, duke respektuar angazhimet e ekzistuese ndaj partnerëve dhe donatorëve.
“Ne e kemi planifikuar këtë për ca kohë, por tani jemi duke përshpejtuar vendimet kryesore në dritën e efekteve të pandemisë globale,” tha në një deklaratë Chema Vera, drejtoresha ekzekutive ndërkombëtare e Oxfam.
Ajo foli për një situatë të zymtë të financave të Oxfam-it, duke shpjeguar sesi mbyllja e dyqaneve dhe anulimet e mbledhjeve të fondeve kishin çuar në humbje të të ardhurave.
“Koronavirusi e ka bërë më jetike se kurrë punën e Oxfam për të ndihmuar njerëzit më vulnerabël në botë, ndërsa në të njëjtën kohë, po ndikon në aftësinë tonë për të ofruar,” tha Vera.
“Ne jemi jashtëzakonisht mirënjohës ndaj donatorëve dhe përkrahësve tanë, bujaria e vazhdueshme e të cilëve po na ndihmon të ngrihemi në këtë sfidë të paparë.”/BBC
