Ish-ambasadori i Shqipërisë në Kosovë, Gëzim Podgorica, e sheh të mundshëm skenarin e zgjedhjeve të reja në Kosovë.

Ndërsa negociatat mes Vetëvendosjes dhe Lidhjes Demokratike të Kosovës për krijimin e qeverisë kanë ngecur, Podgorica thotë se marrëveshja mund të arrihet vetëm në rast të një ndërhyrje të faktorit ndërkombëtar.

“Vështirë se do të ketë marrëveshje përfundimtare, vetëm nëse do të vazhdojë siç ka pasur dhe gjatë ditës së sotme një intensifikim të përpjekjeve të faktorit ndërkombëtar të pranishëm në Kosovë që e kanë udhëhequr këtë proces për të shpejtuar ngritjen e institucioneve të Kosovës”, ka thënë ai në një intervistë për “Rtv Ora”.

Diplomati thotë se futja sërish në zgjedhje do t’ia vështirësonte situatën liderit të VV-së, Albin Kurtit, por ka besim te elektorati. Për një gjë ai është i sigurt, LDK do të ndëshkohet me votë si parti tinëzare.

“VV do të kishte më shumë kundërshtarë politikë që do të krijonin një aleancë mes vetes dhe kjo do ta t’ia vështirësonte paraqitjen dhe disa avantazhe që mund të kishte nga zgjedhjet e kaluara. Por duke besuar në një gjykim të ftohtë të publikut dhe duke besuar që VV ishte e sinqertë në gjithë aksionin politik para zgjedhjeve dhe tani besoj se mund të kemi një rritje të mbështetjes publike, por që është e padiskutueshme rënia e mbështetjes për LDK sepse do të quhej partia tinëzare që nuk realizoi çfarë kishte premtuar”, u shpreh ai.

E ndërsa duket se i gjithë debati rrotullohet te zgjedhja e presidentit, ai e sheh thjesht pretekst.

“Çështja e Presidentit nuk u diskutua as para zgjedhjeve dhe as pas zgjedhjeve. Ka disa nonsense që ka hyrë në tryezën e diskutimeve dhe ka ardhur më shumë si pazar i imponuar nga LDK për të penguar më shumë procesin sesa për të shtyrë gjërat përpara”, shprehet Podgorica.

Por pse po pengohet Albin Kurti?

“LDK-ja dhe partitë e tjera nuk duan të prishin atë marrëdhënie që kanë pasur me njëra-tjetrën, pavarësisht debatit publik. Nuk duan të prishin pazaret e pushtetit, pazaret për ndarjen e institucioneve. VV me në krye Albin Kurtin është një parti jashtë këtij formati, një parti që trondit themelet e sistemit. Kjo ka bërë që të pengohet me të gjitha mjetet ardhja ashtu si duhej dhe pritej e VV-së në krye të qeverisë”, tha ai në fund.