Mijëra qytetarë izraelitë kanë protestuar të shtunën kundër planit të kryeministrit Benjamin Netanyahu për të shtrirë sovranitetin mbi Bregun Perëndimor, de-fakto aneksimin e tokës të cilën palestinezët e konsiderojnë shtet.
Duke protestuar me maska dhe duke mbajtur distancën sipas rregullave kundër koronavirusit, protestuesit kanë brohoritur “jo aneksim, jo okupim, po paqe e demokraci”.
Palestinezët duan shtet të pavarur në Bregun Perëndimor, Jerusalemin lindor dhe në Rripin e Gazas, territore të cilat Izraeli i mori në luftën e Lindjes së Mesme më 1967, raporton Reuters.
Netanyahu ka caktuar 1 korrikun si datë për të nisur avancimin e planit të tij për aneksimin e vendbanimeve të Izraelit dhe Luginën e Jordanit në Bregun Perëndimor, duke shpresuar se do të marrë dritën e gjelbër nga Uashingtoni.
Presidenti amerikan Donald Trump në janar shpalosi një plan të paqes ku theksohej se Izraeli do të mbante vendbanimet e tij dhe palestinezët do të ndërtonin shtetin nën kushte të rrepta. Palestinezët kanë refuzuar propozimin.
Duke shprehur shqetësimet për dhunë, disa vende evropiane e arabe, bashkë me Kombet e Bashkuara, kanë kërkuar nga Izraeli të tërhiqet nga plani për aneksimin e vendbanimeve, që nga shumë shtete konsiderohen ilegale.
