Ka nisur vetëm tri ditë më parë, por përballja gjyqësore mes dy ish-bashkëshortëve Amber Heard dhe Johnny Depp ka bërë lajm kudo.
Me dëshmitarët që kanë folur përgjatë 72 orëve të fundit përpara gjykatësit, janë zbuluar e publikuar fakte të panjohura më parë, përmes të cilave aktori 58-vjeçar synon të përfitojë 50 milionë dollarë si dëmshpërblim për prishje të imazhit dhe karrierës së tij nga akuzat e ish-gruas.
Laurel Avis Anderson, këshilltari i martesës që ka ndjekur çiftin, përpara divorcit, i thirrur si dëshmitar në gjyq, është shprehur se ashtu siç ka plotësuar edhe letrat para ndarjes, se ishte Amber ajo që gjithnjë kishte iniciuar sherret, duke nxitur debat e madje edhe dhunën.
Edhe motra e aktorit 58-vjeçar rrëfeu në sallën e gjyqit se kunata e saj e quante bashkëshortin vazhdimisht një burrë plak, të rrudhur e të shëmtuar, madje edhe një derr të pështirë.
Por, ajo që duket se i vuri kapakun një ditë më parë sjelljes së aktores 35-vjeçare ishin tradhtitë, të provuara edhe në video, e para me aktorin James Franco dhe e dyta, një lidhje e gjatë dashurie, me miliarderin Elon Musk, të dyja paralelisht në kohën kur ishte e martuar me Johnny Depp.
Ekipi ligjor i aktorit ka kërkuar që të dy personazhet të thirren në gjyq si dëshmitarë, por ligji amerikan nuk detyron dot askënd që të thirret si i tillë. Amber i thërriste të dashurit e saj në shtëpinë ku jetonte me të shoqin.
Edhe pse këtë herë gjyqin për shpifje e nisi me një akuzë aktori Depp, duke kërkuar dëmpshërblim prej 50 milionë dollarësh, edhe aktorja Heard ka ngritur një padi, që nëse e fiton, i rrëmben ish-bashkëshortit jo pak, por 100 milionë dollarë.
