Kryeministri Edi Rama deklaroi sot se qeveria e ka të nevojshme ta dëgjojë mendimin e të gjithë qytetarëve për nismën e “Ballkanit të Hapur”
I pyetur nga gazetarët pas mbledhjes së qeverisë, nëse është vonë për të pyetur shqiptarët për nismën e “Open Balkan”, pasi disa nga marrëveshjet fillojnë të implementohen në janar, Rama tha se, “nuk është asnjëherë vonë për të pyetur njerëzit. Nëse do ta kishim këtë instrument në dispozicion më parë, mbase mund ta kishim vënë në shfrytëzim më parë”.
“Nuk diskutohet që unë i qëndroj të gjithë atyre që kam thënë për “Open Balkan” dhe jam i bindur, por e kemi të nevojshme ne, qeveria, ta dëgjojmë mendimin e të gjithëve në mënyrë komplet të lirshme, pa na u drejtuar si i PS-së, e i bravës, por duke na u drejtuar si shqiptarë. Dhe me këtë mësojmë ne, mësojnë dhe të tjerët. “, tha Rama.
“Thashë, ne do të këshillohemi me njerëzit, jo për t’iu imponuar kujtdo-qoftë, por për të marrë ne njëherë mendimin xhenuin të njerëzve. Dhe kjo për në është të shkuarit në një burim të pashtershëm energjie, që është energjia e popullit”, theksoi Rama.
“Ne kemi nevojë ta shfrytëzojmë këtë burim të pashtershëm energjie, që është energjia e popullit. Ne kemi nevojë ta shfrytëzojmë këtë burim të pashtershëm energjie për vendimmarrjet tona. Të tjerët mund të thonë çfarë të duan. Kur flas për të tjerët nuk flas për njerëzit. Flas për përfaqësuesit e tyre që merren me brava apo që merren me sfurqe. Kjo nuk na duhet. Këto nuk janë zgjedhje. Ky është një referendum klasik, ky është një Këshillim Kombëtar. Dhe ne duam ta marrim këtë burim energjie dhe ta vëmë në dispozicion të qeverisjes së të gjithë shqiptarëve dhe duam t’u japim të gjithë shqiptarëve mundësinë që të jenë pjesë e këtyre vendimmarrjeve”, u shpreh Rama.
I pyetur nëse do të ketë amnisti për të gjithë të dy punësuarit që tatohen me taksë progresive, Rama tha se, “kjo e dyta mbase mund të jetë një pyetje për Këshillimin e ardhshëm Kombëtar. Sepse përsëri është një nga ato vendime që janë përtej interesit të një shumice të thjeshtë”.
