Kryeministri Edi Rama i përsëriti sot apelin grave naftëtare të Ballshit që të ndërpresin grevën e urisë.
“Jam gati të vij tek ju sapo të mbyllni grevën e të flasim si do mundemi t’ju ndihmojmë për këtë hall që nuk e ka krijuar qeveria” shkruan Rama në një Twitter.
“Ne po punojmë për të gjetur investitorë seriozë që të rindezin rafinerinë edhe pse greva juaj nuk ndihmon as për këtë! Ndërsa për ndihmën e mundshme shtetërore ndërkohë, meqë ju s’pranoni as të dilni në asistencë, ka vetëm një rrugë: Mbyllni grevën dhe ulemi qajmë hallin!” shkruan Rama në Twitter.
Menjëherë ka ardhur dhe reagimi nga Ballshi. Gratë naftëtare janë gati të nisin diskutimet me Ramën por pa ndërprerë grevën e urisë.
Gratë naftëtare ndodhen në ditën e 14-të të grevës së urisë.
