Kryeministri Edi Rama ka publikuar apelin e aktorit të njohur, Reshat Arbana drejtuar veçanërisht të rinjve që të vaksinohen ndaj COVID-19.
Arbana shprehet se duhet të mendojmë më shumë për mbrojtjen e të drejtave tona njerëzore.
Në mesazhin e tij për t’u vaksinuar, “Nderi i Kombit”, Reshat Arbana shprehet se duhet t’i ruajmë e t’i mbrojmë njerëzit e zemrës nga transmetimi i këtij virusi të rrezikshëm.
“Ndihet, për fat të keq, një lëkundje e dëshirës për të marrë vaksinën, në gjirin e të rinjve. Dëshira ime është që të mendojmë më shumë për mbrojtjen e të drejtave tona njerëzore:
Së pari, të jemi të fortë e të shëndetshëm – e theksoj- të fortë e të shëndetshëm.
Së dyti, të jemi të gëzuar e të lumtur.
Të falim sa më shumë dashuri për njerëzit e dashur të zemrës. T’i ruajmë e t’i mbrojmë ata nga transmetimi i këtij virusi të rrezikshëm”, shprehet aktori Arbana.