Sekretari i Përgjithshëm i NATO-s, Jens Stoltenberg ka dënuar vendimin e Rusisë për t’u tërhequr nga marrëveshja e grurit të Detit të Zi pavarësisht përpjekjeve të Turqisë për të ndërmjetësuar.
“Unë dënoj vendimin e njëanshëm të Rusisë për t’u tërhequr nga Nisma e Drithërave të Detit të Zi, pavarësisht përpjekjeve të aleatit tonë Turqisë dhe OKB-së”, tha Sekretari i Përgjithshëm i NATO-s, Jens Stoltenberg në Tëitter.
Stoltenberg nënvizoi se lufta e paligjshme e Rusisë kundër Ukrainës vazhdon të dëmtojë miliona njerëz në mbarë botën.
Ndërkaq Sekretari Amerikan i Shtetit Antony Blinken ka deklaruar se vendimi i Rusisë për të ndaluar pjesëmarrjen në marrëveshjen njëvjeçare që lejon Ukrainën të eksportojë grurë përmes Detit të Zi ishte i pandërgjegjshëm dhe bëri thirrje që pakti të rivendoset sa më shpejt që të jetë e mundur.
“Rezultati i veprimit të sotëm të Rusisë për armatimin e ushqimit… do të jetë që ushqimi të bëhet më i vështirë për t’u gjetur në vendet që kanë dëshpërimisht nevojë për të dhe që çmimet do të rriten”, ka theksuar Blinken, transmeton Al Jazeera.
Duke folur para gazetarëve, Blinken tha se Uashingtoni po monitoronte situatën pas sulmit në urën e Krimesë në Rusinë jugore, duke shtuar se i takon Ukraina të vendosë se si do ta zhvillojë luftën.
