Pas miratimit të mandateve të fituara dhe listës emërore të deputetëve për secilën parti politike nga Komisioni i Përkohshëm i Verifikimit të Mandateve, 140 deputetët e Legjislaturës X të dalë nga zgjedhjet e 25 prillit u betuan sot në Kuvend.
Në seancën parlamentare të orës 17:00, deputetja më e vjetër e Kuvendit, Luljeta Bozo lexoi formulën e betimit të deputetit, ndërsa të gjithë deputetët u përgjigjën “Betohem!”
“Betohem me nderin tim se do të kryej me ndërgjegje detyrën si deputet i popullit në Kuvend, do të përfaqësoj denjësisht popullin, do t’i bindem Kushtetutës dhe ligjeve, do të mbroj lirinë dhe pavarësinë e Shqipërisë, do të respektoj dhe do të mbroj të drejtat dhe liritë e shtetasve dhe do të punoj me të gjitha fuqitë e mia për përparimin e atdheut dhe mirëqenien e popullit tim”, u betuan deputetët.
Partia Socialiste ka marrë 74 mandate, PD-AN 59 mandate, LSI 4 mandate dhe PSD 3 mandate.
Kuvendi po vijon punimet me votimin për kandidaturën e Lindita Nikollës, deputete e Partisë Socialiste si kryetare e Kuvendit.
