Bllokimi i Kuvendit nga ana e deputetëve të VMRO-DPMNE-së vazhdoi në atmosferë të tensionuar edhe sot në ditën e dytë! Vërejtje të vazhdueshme procedurale dhe përpjekje për të dalë nga salla për të mos siguruar kuorumin e nevojshëm për fillimin e seancës.
Ata para foltores dolën me pankartat “Bllokadë aktive e Kuvendit për shpëtim kombëtar”, duke përsëritur se bllokada do të vazhdojë derisa të merren vesh për mbajtjen e zgjedhjeve të parakohshme parlamentare.
“Ndoshta ata na akuzojnë për shkak të bllokadës, por në ndërkohë ata në Kuvend tentojnë të shtyjnë një Ligj për lotari të posaçme dhe të bëjnë një organ të veçantë ku BDI-ja do ta ketë fjalën kryesore në atë lotari.
Në fund të ditës mund të shohim se ata nuk mund të dorëzojnë ndonjë ligj ekonomik për të mirën e qytetarëve, por dorëzojnë ligje për t’i mbushur xhepat e tyre. E kjo është ajo që VMRO-DPMNE-ja nuk e pranon dhe për këtë arsye do të ketë bllokadë aktive“, tha Vllado Misajllovski, nënkryetar i VMRO-DPMNE-së.
Kryetari i Aleancës për Shqiptarët, Ziadin Sela thotë se është e drejtë legjitime e çdo subjekti politik për mënyrën e veprimit të tij në Kuvend. Sipas tij, nuk ka asnjë mënyrë tjetër funksionimi kur bëhet fjalë për ligjin për lojërat e fatit me të cilin ka lidhje BDI-ja.
Nga LSDM-ja në rrjetet sociale publikuan një tablo nga lideri i VMRO-DPMNE-së, Hristijan Mickoski bashkë me deputetët në të cilën shkruan: “Jopunëtorët dhe kujdestari i klasës, këta na kushtojnë 55.000 euro në muaj”. Edhe sot kërkuan që të gjithë deputetët që e pengojnë punën e Kuvendit, t’i kthejnë pagat e tyre.
“Deputetët e VMRO-DPMNE-së le t’i kthejnë paratë për pagat, mëditjet, shpenzimet rrugore dhe celularët. Mbi 55.000 euro në muaj në kohë krize, janë para serioze me të cilat mund të ndihmohen mijëra familje. Deputetët në Kuvend janë zgjedhur nga ana e popullit për të sjellë zgjidhje ligjore në interes të qytetarëve dhe shtetit. Qytetarët nuk ua kanë dhënë besimin deputetëve që të bllokojnë“, deklaroi Bogdanka Kuzevska, zëdhënëse e LSDM-së.
Bllokada e Kuvendit, të paktën sipas asaj që po e paralajmëron VMRO-DPMNE-ja, do të zgjasë derisa pushteti të pajtohet të mbahen zgjedhje të parakohshme parlamentare.
