Operacioni “Warp Speed” premtoi të përshpejtojë zhvillimin, prodhimin dhe shpërndarjen e vaksinave antiCOVID-19 në SHBA.
“Kjo do të jetë një përpjekje masive shkencore, industriale dhe logjistike”, tha presidenti Donald Trump në një konferencë shtypi, pas njoftimit të fillimit të këtij operacioni.
Por, deri tani operacioni po dështon në misionin e tij kryesor, atë të marrjes së vaksinave për publikun amerikan.
Pavarësisht muajve për t’u përgatitur, përpjekja për shpërndarje duket se po ndryshon nën peshën e burokracisë.
Linjat online të regjistrimit dhe faqet e internetit janë prishur. Kërkesa masive është gjithashtu e dukshme në radhët e gjata të të moshuarve në klinika.
Me ritmin aktual, do të duheshin vite për të vaksinuar publikun amerikan.
“Duket se ka pasur një ngërç të konsiderueshëm në procesin e planifikimit”, thotë David Johnson, një konsulent i kujdesit shëndetësor me qendër në Çikago.
Më shumë se 17 milion doza të vaksinës COVID-19 janë dërguar në spitale dhe farmaci në të gjithë vendin, por që nga dje në mëngjes, më pak se 5 milionë ishin përdorur, sipas Qendrës amerikane për Kontrollin dhe Parandalimin e Sëmundjeve.
Zyrtarët federalë të shëndetësisë thanë në dhjetor se kishin në plan të vaksinonin 20 milionë amerikanë para vitit të ri.
Vaksinat janë falas, por qeveria federale ua ka lënë në dorë zyrtarëve të shtetit për të vendosur se si t’i shpërndajnë ato.
Kur vaksinat arrijnë në vendin e shpërndarjes, disa faktorë të tjerë pengojnë punën.
Duhet të ketë mjaft hapësirë për ngrirje, shiringa dhe punonjës shëndetësorë për të administruar vaksinat. Më e rëndësishmja, njerëzit duhet të kontrollohen dhe të udhëzohen se kur dhe ku të paraqiten për injeksionet e tyre.
Në Hjuston, ku kanë të drejtë të moshuarit dhe ata të moshës 16 vjeç e lart me sëmundje bashkëshoqëruese, një linjë telefonike për takime doli jashtë funksionit pas telefonatave të 250 000 qytetarëve.
Të hënën, kryebashkiaku i Hjustonit, Sylvester Turner premtoi të krijojë një zonë të stërmadhe për vaksinimet deri këtë të shtunë.
Në Florida, raportet e lajmeve tregonin të moshuar të rreshtuar në karrige duke pritur orë të tëra për të bërë vaksinën.
Në Tampa, faqja e internetit e regjistrimit të vaksinave doli nga funksioni brenda disa minutash. Konteja po bën tani rezervime vetëm me telefon.
Regjistrimi i banorëve të azileve për vaksinim përballet me një sfidë tjetër: Sipas ligjit federal, banorët ose përfaqësuesit e tyre duhet të japin pëlqimin për çdo trajtim.
“Ne po shohim shumë përplasje”, tha Richard Mollot, drejtori ekzekutiv i Koalicionit të Komunitetit për Kujdesin Afatgjatë, një organizatë avokatie me qendër në Nju Jork.
“Kjo me të vërtetë duhej të ishte bërë muaj më parë, kur ne e dinim paraprakisht që një vaksinë do të vinte”, theksoi ai.
Ai fajësoi zyrtarët federalë për dështimin.
Në Nju Jork ndërkohë, guvernatori Andrew Cuomo tha se nëse spitalet që nuk i përdornin furnizimet brenda një jave nga marrja e tyre,aëtherë vaksinat do të tërhiqeshin nga rrjetet e shpërndarjes dhe spitalet do të gjobiteshin deri në 100 000 dollarë.
“Ne i duam ato vaksina në krahët e njerëzve”, tha ai.
‘’Në të vërtetë, shumë prej sistemeve shëndetësore përgjegjëse për shpërndarjen e vaksinave po përpiqen të mbajnë kërkesën e paprecedentë për testimin e koronavirusit dhe kujdesin ndaj pacientit mes një rritje masive të infeksioneve’’, sipas kryekirurgut amerikan, Jerome Adams.
Përhapja e ngadaltë e vaksinimit parashikon dobësimin e shpresës së një vaksinimi të shpejtë të një numri të madh njerëzish dhe arritjen e imunitetit të tufës, që ekspertët thonë se është thelbësore për të përmbajtur virusin.
