Komisioni i Pavarur i Kualifikimit shkarkoi kryetarin e Gjykatës së Apelit të Krimeve të Rënda, Fehmi Petku.
Gjyqtari Petku doli në seancë dëgjimore para Komisionit të Pavarur të Kualifikimit më 2 prill.
Sipas Inspektoriatit të Deklarimit të Pasurive gjyqtari kishte mungesë të burimeve të ligjshme, deklarim të rremë, fshehje pasurie për ¼ për tre troje e dy banesa.
Nga hetimi i KPK rezultoi se, familja Petku kishte kryer dhe një transaksion në vitin 1996 prej 520 mijë dollarë me firmën piramidale Vefa.
Petku drejtoi prej katër vitesh Gjykatën e Apelit për Krime te Rënda ku ka qenë edhe pjese e shqyrtimit të disa dosjeve te rëndësishme. Ai ishte edhe pjesë e treshes që po shqyrton dosjen Shullazi në këtë gjykatë.
Shkarkohet edhe një prokuror
Komisioni i Pavarur i Kualifikimit shkarkoi edhe drejtuesin e Prokurorisë së Sarandës, Edison Ademin.
Seanca dëgjimore ndaj prokurorit Ademi u zhvillua të premten (5 prill). Shkelja e etikës dhe shoqërimi me persona që kanë qenë duke u hetuar për armëmbajtje e trafik droge penalizuan Ademin.
Sipas rezultateve të vettingut, rezultoi se ai kishte folur në telefon me shtetasin E.M që e kishte hetuar për armëmbajtje, si dhe kishte udhëtuar drejt Kosovës në 2014 me automjetin e një të hetuari për trafik droge.
Po ashtu vettingu i gjeti Ademit probleme me pasurinë, edhe se sipas raportit të ILDKPI-s ai kishte burime për ti justifikuar, por i kishte fshehur dhe kishte bërë deklarime të pasakta ndër vite.
Vetë Ademi ka akuzuar ILDKPI –në se kishte shkelur ligjin dhe kishte cënuar sigurinë e tij duke publikuar deklaratat e tij në media./Ora News/
