Si pasojë e shpërthimit të një depoje të madhe armësh në Kazakistan, raportohet se një qytet i tërë është detyruar të evakuohet.
Ngjarja ndodhi në jug të Kazakistanit, ku janë evakuuar rreh 40.000 banorë dhe sipas medieve raportohet edhe për të plagosur.
“Paniku përfshiu qytetin e Arys pas zjarrit që u shoqërua me shpërthimin e qindra municioneve të magazinuara në depo”, thuhet në një komunikatë të Ministrisë së Mbrojtjes në Kazakistan.
Përdoruesit e rrjeteve sociale publikuan pamje ku shfaqen qytetarët duke u larguar nga zona, ku automjete të posaçme janë vënë në dispozicion.
Sipas ekspertëve, shkaqet e shpërthimit ende nuk dihen.
