Sot festohet Dita e Verës, ku kryeqendra mbetet padyshim në Elbasan, por që në vitet e fundit është shndërruar në një ditë të shënuar në çdo cep të Shqipërisë, ku nuk mund të mungojnë ballokumet tradicionale.
Në qytete të ndryshme festimet kanë nisur që një natë para, ku qytetarët kanë ndezur zjarrin që simbolizon djegien e dimrit dhe të këqijat dhe për të rikthyer dritën e shpresës tek njerëzit.
Kryeministri Edi Rama ka uruar të gjithë qytetarët për Ditën e Verës. “Mirëmëngjesi dhe me kënaqësinë që më në fund po çel gjethi, ju uroj një 14 Mars me këmbë të mbarë për stinën e re”, ishin fjalët e tij në rrjetet sociale.
Rreth 100 aktivitete pritet të mbahen gjatë gjithë ditës së sotme në kryeqytet, ku në bulevardin “Dëshmorët e Kombit” do të organizohen kurse kuzhine, panaire dhe lojëra popullore me animatorë. Ndërkohë, Sheshi Nënë Tereza do t’i kushtohet sporteve, me aktivitete nga volejbolli tek artet marciale dhe fitnesi.
Parku i Liqenit Artificial do t’i kushtohet muzikës, me bandën e qytetit dhe ansamble të ndryshme, si dhe ekspozita pikture për fëmijët. Nga ora 16:50, në do të mbahen koncerte me disa nga këngëtarët më të dashur nga publiku, nga Erand Libohova te Era Rusi, Eneida Tarifa dhe West Side Family.
Ditën e sotme do organizohen një sërë aktivitetesh natyrisht edhe në Elbasan, qyteti ku i ka rrënjët kjo festë. Fillohet me paradën e Karnavaleve në orën 09:00, duke vijuar me koncerte për fëmijë, panairin e zejeve, ekspozita dhe koncerte të ndryshme.
