Kreu i Grupit Parlamentar të PD-së, Gazment Bardhi, i ka quajtur “fenomen” qeverisjeje urdhërarrestet e ekzekutuara të enjten për koncesionin e sterilizimit.
Partia Demokratike ka aluduar prej nisjes së hetimeve nga SPAK se kontrata që parashikonte dezinfektimin e aparaturave dhe sallave kirurgjikale ka në sfond korruptimin e shumë funksionarëve të lartë.
“Korrupsioni, abuzimi me detyrën dhe shpërdorimi i fondeve publike, për klientë të parazgjedhur të Qeverisë së Edi Ramës është fenomen i shtrirë kudo në çdo segment të qeverisjes. Ai ka marrë tashmë tiparet e një modeli të përgjithshëm qeverisje që ka dëmtuar rëndë interesin publik.
Korrupsioni me kontratat publike në shëndetësi nuk është i izoluar vetëm tek koncesioni i sterilizimit. Ai shtrihet nga koncesioni i check-up, e deri tek kontratat sekrete për furnizimet në periudhën e pandemisë,” shkroi Bardhi në Facebook.
Ndërsa përshëndeti SPAK dhe GJKKO për hapin e hedhur në ndëshkimin e korrupsionit në shëndetësi, sipas Bardhit përgjegjësia duhet të bjerë edhe mbi figurat e larta të shtetit.
“Edi Rama, Ilir Beqaj dhe Ogerta Manastirliu duhet të hetohen e ndëshkohen për miliona euro abuzime e vjedhje në kurriz të shëndetit dhe jetës së qytetarëve. Askush mbi ligjin duhet të marrë formë çdo ditë pak nga pak, derisa të shndërrohet në model të drejtësisë që presin dhe duan qytetarët,” shkroi deputeti i Partisë Demokratike.
