Britania duhet të rishikojë sistemin e saj rregullativ të ujërave që të krijojë një mekanizëm të vetëm të fuqishëm për të zëvendësuar aktualin “Ofwat”, në mënyrë që të mbrojë më mirë konsumatorët dhe mjedisin – thuhet në një Raport zyrtar të publikuar të hënën – raporton Reuters.
Qeveria laburiste urdhëroi rishikimin e industrisë së privatizuar të ujërave në Angli dhe Uells, pasi derdhjet rekorde të ujërave të zeza në lumenj dhe liqene shkaktuan zemërim të madh.
Kompania më e madhe e këtij sektori “Thames Water” po ka telashe që të shmangë kolapsin për shkak të borxhit të madh dhe ka thënë se po përballet me gjoba prej 1.4 miliardë sterlinash për ndotje dhe me ndëshkime të tjera që duhet t’i shlyejë gjatë 5 vjetëve të ardhshëm.
Ish-zëvendësguvernatori i Bankës së Anglisë Jon Cunliffe, i cili e ka udhëhequr ekipin e rivlerësimit, ka thënë se ka dështuar rregullimi aktual, i ndarë në aspektin mjedisor dhe financiar, i këtij sektori dhe se rregullatori financiar “Ofwat” duhet të zëvendësohet.
Rishikimi konsideron krijimin e një sistemi të ri rregullativ, ku Kompanitë e ujërave do të mund të arkëtonin mjaftueshëm para prej faturave për të rindërtuar asetet, me investitorët që do të mund të mund të përfitonin prej investimeve afatgjata dhe që do të mund të ndikohej në fillimin e përmirësimit të mjedisit.
Në Raport thuhet se është thelbësore që sistemi të përmbushë standardet e së ardhmes dhe që të sigurohet që Kompanitë e ujërave të veprojnë në pajtim me interesin publik dhe privat.
Industrisë britanike të ujërave u duhen më shumë se 134 miliardë dollarë investime gjatë 5 vjetëve të ardhshme, me qëllim që të mund të përmbushin kërkesat e rritjes së popullsisë dhe të ndryshimit klimatik, me konsumatorët të cilët përballen me rritje të faturimit prej 36% gjatë së njëjtës periudhë.
