Oficerët e policisë së Drejtorisë së Policisë Kriminale serbe kanë ndaluar për 48-orë Milan Radoiçiqin, liderin e grupit terrorist serb që kreu sulmin ndaj Policisë së Kosovës të dielën e 24 shtatorit.
Oficerët e policisë, sipas Tanjug, gjatë ditës së sotme ushtruan kontrolle në banesën e Radoiçiq. Ky i fundit është dërguar në Prokurorinë e Lartë Publike në Beograd.
Më 30 shtator, Radoiçiq iu përgjigj ftesës së autoriteteve shtetërore të Serbisë dhe në cilësinë e tij si qytetar dha deklaratë në Ministrinë e Punëve të Brendshme për ngjarjet në Banjskë, më 24 shtator, në veri të Republikës së Kosovës.
Më 26 shtator, ministri i Punëve të Brendshme i Kosovës, Xhelal Sveçla, publikoi një video, ku deklaroi se një burrë i veshur me uniformë dhe armë në duar, i cili ka marrë pjesë në sulmet ndaj Policisë së Kosovës më 24 shtator në Banjskë, është Radoiçiqi.
Paraditen e së dielës (24 shtator), persona të maskuar dhe të armatosur hapën zjarr dhe hodhën granata dore në hyrje të fshatit Banjskë, ku mbeti i vrarë rreshteri Afrim Bunjaku dhe u plagos një tjetër polic.
Policia e Kosovës bëri me dije se eliminoi 3 sulmues, dhe arrestoi 6 të tjerë për posedim të armëve, të municionit dhe të radiolidhjeve. Një ditë më pas u konfirmua dhe një tjetër i vrarë.
Tanjug 3/10/2023 Beograd: Sot është marrë në pyetje në Prokurorinë e Lartë Publike në Beograd, nën dyshimin se ka kryer veprat penale të bashkimit me qëllim të kryerjes së veprave penale, prodhimit, posedimit, mbajtjes dhe shitjes pa leje të armëve të zjarrit me, për. për momentin disa persona të panjohur dhe të lëndëve shpërthyese dhe kundërvajtje të rënda kundër sigurisë së përgjithshme.
Gjatë marrjes në pyetje, i dyshuari ka mohuar kryerjen e veprave penale që i ngarkohen, njofton prokuroria.
Pas seancës, prokuroria i propozoi gjyqtarit për procedurë paraprake të Gjykatës së Lartë në Beograd që të caktohet masa e paraburgimit për të dyshuarin për shkak të rrezikut të arratisjes.
