Detaje të reja nga dosja hetimore zbulojnë ndërhyrje të drejtpërdrejta të ish-ministres Belinda Balluku në procedurat e tenderëve për lotet e Unazës së Madhe. Komunikimet mes saj dhe ish-drejtorit të ARRSH-së, Evis Berberit, tregojnë se dyshja koordinonte jo vetëm fituesit, por edhe momentin kur duhej publikuar zyrtarisht njoftimi.
Sipas dosjes, më 1 tetor 2021, disa orë para shpalljes së fituesit për lotin 4, Balluku i kërkoi Berberit të përgatitej për publikimin ditën e hënë. Nga mesazhet rezulton se ajo udhëzonte edhe orën se kur duhej të dilte njoftimi, ndërsa mbrëmjen e të njëjtës ditë, ajo e urdhëroi që shpallja të shtyhej për të mërkurën.
Dosja dokumenton se më 6 tetor 2021, në orën 20:03, sistemi elektronik i prokurimeve regjistroi përfundimin e vlerësimit të ofertave për lotin 4, në përputhje me instruktionet e Ballukut.
Ndërhyrjet e saj shfaqen edhe më 5 tetor, kur Berberi e informoi se emisioni investigativ “Stop” kishte kërkuar të dhëna për procedurat e lotit 1. Reagimi i ish-ministres ishte i ashpër: “Të plasi trapi. Bëj punën dhe zbato ligjin. Nesër publikoji të gjitha në darkë.”
Pjesë nga dosja:
Në datën 01.10.2021, në orën 10:47, shtetasja Belinda Balluku i dërgon shtetasit Evis Berberi mesazhin “Behu gati per unazat te henen ne mengjes”.
Në orën 10:48, Evis Berberi: “Njoftimin? Apo inspektim”. Në orën 10:48, Belinda Balluku: “Njoftimin more”. Në orën 10:48-10:49, Evis Berberi: “Jo sot ne darke? Ska ndryshim?”.
Në orën 10:49, Belinda Balluku: “A do ti nxjerresh ne darke sot? Shume mire Por do te te them”. Në orën 10:50, Evis Berberi: “Ok po pres po mé duhen 3 ore kohe nese ka ndryshime”. Në orën 10:52, Belinda Balluku: “Asnje ndryshim”.
Në orën 10:52, Evis Berberi: “Ok”. Në orën 10:52, Belinda Balluku: “Thjeshte te bej kengen Por jam ne kukes”. Në orën 16:12 Evis Berberi: “Unazat nga ora 10 e darkes”.
Në orën 21:18, Evis Berberi: “Te vazhdojme apo te presim per neser”.
Në orën 21:31-21:32, Belinda Balluku: “Jo, te mërkurën Ikni shijoni fundjavën Merruni me pune serioze Ke nje plehre aty qe flet”. Në orën 21:33, Evis Berberi: “Cfare ka dale Ok te merkuren”.
Në datën 05.10.2021, në orën 12:50, shtetasi Evis Berberi i dërgon shtetases Belinda Balluku mesazhin “Ka ardhur Stop dhe kerkon informacion per proceduren e prokurimit Loti 1 (Shqiponja). I thame bej kerkese me shkrim te marresh pergjigje e beri,kerkojne te dine nese eshte shpallur fituesi, ka pasur ankesa, nese nuk eshte shpallur pse jo? Ben dhe nje kronike jashte dhe iken”. Në orën 12:50-12:51, Belinda Balluku: “Te plasi trapi Bej punen dhe zbato ligjin Kur te te vi ty afati i pergjigjes, do kesh mbaruar me procedurat Neser publikoji te gjitha ne darke`.
