Për vdekjen e ish-presidentit të Francës, Jacques Chirac, ka reaguar edhe presidenti i Kosovës Hashim Thaçi.
Thaçi, përmes një postimi në Facebook, ka thënë se Chirac ka qenë një prej figurave më të mëdha të politikës botërore që i doli në ndihmë Kosovës në ditët më të vështira, sidomos në Konferencën e Rambouillet dhe bombardimeve kundër Serbisë.
“Me keqardhje të madhe mora lajmin për vdekjen e ish Presidentit të Francës, Jacques Chirac. Ai ishte njëri prej figurave të mëdha të politikës botërore që i doli në ndihmë Kosovës në ditët më të vështira, sidomos në Konferencën e Rambouillet dhe përkrahjen për bombardimin e caqeve të policisë dhe ushtrisë serbe në vitin 1999”, ka shkruar Thaçi.
Gjithashtu, Thaçi ka shkruar se “Chirac do të mbetet një burrështetas i respektuar dhe emër për të cilin qytetarët e Kosovës do të jenë përjetësisht mirënjohës!”.