Real Madrid, Barcelona dhe Juventus janë ende tre klubet që kanë mbetur në SuperLigën Europiane të krijuar e më pas të shkrirë brenda pak kohësh. Teksa çështja po kalon disa etapa ligjore ku pritet të vendosë Gjykata Europiane, Kreu i Ligës Spanjolle të futbollit, Javier Tebas nuk ndalet duke sulmuar dy klubet e La Ligas.
“Florentino Perez ka mbi 20 vjet që e mendonte këtë projekt, nuk është se u mendua dhe u ngrit tani. Është një shaka të mendosh se një garë sportive duhet të qeveriset nga numri i ndjekësve të rrjeteve sociale të një klubi. Disa gjëra nuk mund të vihen në diskutim dhe duke e dëgjuar Perezin, kam përshtypjen se ai mendonte se ishte Robin Hood, sikur do të shpëtonte futbollin. Ata po shpikin një histori që nuk është e bazuar në realitet. SuperLiga e re nuk do të sillte më shumë para për futbollin”, përfundoi Tebas duke nënvizuar faktin se klubet e përfshira në këtë projekt duhet të sanksionohen “për shkeljen e statutit të UEFA-s.
Ndërkohë që Barcelona, Real Madrid dhe Juventus, u lejuan të marrin pjesë në Champions League sezonin e ardhshëm e nga ana tjetër po luftojnë nëpër gjykata, në Angli çështjen e SuperLigës e kanë marrë shumë seriozisht.
Tifozët nuk e duan dhe Federata Angleze ka vendosur të adoptojë një normë që do të pengonte klubet pjesëmarrëse në SuperLigë të blinin lojtarë të huaj në merkato.
“Big Six”, 6 klubet e mëdha, Man. United, Man. City, Chelsea, Liverpool, Arsenal dhe Tottenham u përfshinë në projekt por pas reagimit të fortë nga tifozët, të gjithë u larguan në bllok.
