Presidenti amerikan Donald Trump ndodhet në Japoni, ndalesa e dytë e turit të tij në Azi.
Pasi u takua me kryeministren e sapozgjedhur të atij vendi, Sanae Takaichi me të cilën nënshkroi edhe një marrëveshje për një epokë të artë marrëdhëniesh dypalëshe dhe bashkëpunim në nxitjen e furnizimit dhe prodhimit të mineraleve të rralla, Trump mbajti një fjalim para trupave amerikane në bord të aeroplanmbajtëses USS George Washington.
Në fjalimin që zgjati 53 minuta, presidenti amerikan foli për tarifat që ka vendosur ndaj importeve nga shumë vende të botës.
“Tarifat kanë qenë kaq të mira. Kemi arritur të bëjmë triliona e triliona dollarë,” u shpreh ai, duke theksuar se tarifat gjithashtu kishin kontribuar në ndaljen e shumë luftërave, siç ishin tensionet mes Indisë dhe Pakistanit.
Për Japoninë, kryeministrja e së cilës e shoqëroi gjatë vizitës në aeroplanmbajtëse dhe të cilën Trump e cilësoi si “fitimtare”, presidenti amerikan tha se ishte investitore e madhe në SHBA, dhe bëri të ditur se Takaichi e kishte informuar se kompania Toyota do të investonte 10 miliardë dollarë në ndërtimin e fabrikave në SHBA.
“Shkoni dhe blini një Toyota,” u shpreh ai duke iu drejtuar trupave amerikane.
Brohorima shoqëruan fjalimin e presidentit kur ai u shpreh se mbështeste rritjen e pagave për ushtrinë amerikane, megjithëse, siç tha ai, demokratët nuk do ta miratonin një gjë të tillë.
Më herët, gjatë takimit me Takaichi-n, e para kryeministre grua e Japonisë dhe aleate e ish-kryeministrit të ndjerë Shinzo Abe, dy udhëheqësit nënshkruan një marrëveshje tregtare, ku premtohet për një epokë të artë në marrëdhëniet dypalëshe, dhe që rikonfirmon marrëveshjet e nënshkruara në fillim të këtij viti mes dy vendeve.
Sipas dokumentit, SHBA do të vendosë një tarifë prej 15 për qind ndaj të gjitha importeve japoneze, përfshirë automjetet, çka është më e ulët se 25 përqindëshi që Trump kërcënoi fillimisht të vendoste.
Në këmbim, Japonia është zotuar të investojë 550 miliardë dollarë në SHBA dhe të blejë më shumë mallra amerikane.
Udhëheqësit gjithashtu u dakordësuan të bashkëpunojnë përsa i përket prodhimit dhe furnizimit të mineraleve të rralla, me synim reduktimin e varësisë ndaj mineraleve të tilla që ofrohen nga Kina.
