Trupat ruse nuk e kanë më nën kontroll të plotë qytetin jugor të Ukrainës, Kherson, pas një kundërsulmi nga forcat ukrainase, ka thënë një zyrtar i lartë i mbrojtjes amerikane.
Kherson ishte qyteti i parë i madh që u pushtua nga Rusia, me forcat që morën kontrollin e tij brenda javës së parë të pushtimit të saj, shkruan SkyNews.
“Ne nuk mund të vërtetojmë saktësisht se kush e ka kontrollin e Khersonit, por çështja është se nuk duket të jetë aq fort nën kontrollin rus sa ishte më parë. Ukrainasit po përpiqen ta marrin përsëri Kherson”, u tha gazetarëve zyrtari i mbrojtjes.
Zyrtari tha se qyteti jugor po kontestohet nga ukrainasit në luftime të ashpra.
Nëse Rusia humbet Kherson në jug, kjo do të përfaqësonte një pengesë të madhe në fushëbetejë dhe do të komplikonte çdo përpjekje të saj për të kapur portin e Odesës në Detin e Zi, thanë ata.
Nëse ukrainasit e merrnin përsëri Kherson, “ky do të ishte një zhvillim i rëndësishëm, nuk ka dyshim për këtë”. shtoi zyrtari.
Kremlini ka mohuar se ka humbur kontrollin e plotë. /Nacionale/
