Karateisti nga Kosova, Alvin Karaqi, është shpallur kampion në Lojërat Evropiane, duke e përfaqësuar Shqipërinë.
Ai ka folur rreth suksesit të tij në emisionin Sports Show në Klan Kosova.
Por, karateisti nga Kosova tregoi se cilat ishin arsyet se pse ai nuk e zgjodhi vendin e tij për ta përfaqësuar.
“Është kapitull i vitit 2019-të, vitit 2020 dhe nuk dua ta hap sërish. Të gjithë ata që më kanë përcjell e dinë për pakënaqësitë, për padrejtësitë. Unë e kam versionin tim, personat në fjalë e kanë versionin e tyre”, tha ai.
“Unë mendoj që e kam mirë, mendoj se më është bërë e padrejtë. Sot jemi mirë dhe unë zgjas dorën ndaj secilit. Jam krenar ashtu si e kam filluar karrierën për Shqipërinë ashtu edhe po vazhdoj dhe nuk jam larg Kosovës as edhe një metër”, shtoi karateisti.
“Është një kapitull pak a shumë i errët që nuk dua ta hap dhe nuk më bën përshtypje. Kam marrë shumë mësime. Nuk dua të hy andej sepse është një plagë që është shëruar”, theksoi Karaqi.
Karaqi u shpall kampion në kategorinë deri në 84 kilogramë, ku e mposhti holandezin Brian Timmermans me rezultat 3:2.
Fillimisht, karateisti nga Kosova e mundi kroatin Enes Gariboviq me rezultat 2:0, më pas humbi 5:3 nga polaku Michal Babos, ndërsa luftën vendimtare e fitoi ndaj grekut Konstantinos Mastrogiannis. Në gjysmëfinale, ai kishte përballë karateistin nga Italia, Michele Martina, ku luftën e fitoi me rezultat 3:2, ndërsa në finale, ishte më i mirë se holandezi Timmermans.
