Andrea Bregasi, i arrestuar pak ditë më parë pasi ishte i shpallur në kërkim për vrasje të mbetur në tentativë, ka vdekur këtë të shtunë në Qendrën Shëndetësore të Fushë-Krujës.
Sipas burgut të Fushë-Krujës, ku po qëndronte në paraburgim, shkaku i vdekjes ka qenë arresti kardiak, në orën 14:32.
“I paraburgosuri ka shfaqur shqetësime dhe menjëherë rreth orës 14:15 është dërguar në ambulancë në Qendrën Shëndetësore Fushë-Krujë. Shtetasi Bregasi ka qenë përdorues i lëndëve narkotike dhe kishte nisur trajtimin me metadon nga stafi mjekësor i IEVP-ve. Ky trajtim synonte të ndihmonte në rehabilitimin e tij dhe në përmirësimin e gjendjes së tij shëndetësore”, thuhet në njoftim.
33-vjeçari u arrestua më 11 korrik në Durrës, pasi u kap teksa qarkullonte në rrugët e qytetit bregdetar i armatosur me pistoletë. Pas verifikimeve rezultoi se ai ishte në kërkim nga Drejtoria Vendore e Policisë Tiranë, për veprën penale “Vrasja me dashje”, mbetur në tentativë.
Bregasi ishte identifikuar si personi që qëlloi me armë zjarri më 14 dhjetor 2023 në drejtim të Rudolf Zefit në zonën e “Don Boskos”. Pas atentatit, ai u pikas nga kamerat e sigurisë, teksa largohej i qetë, i pamaskuar nga vendi i ngjarjes. Kjo ka bërë që policia ta identifikojë dhe ta shpallë në kërkim. Për kapjen e tij, uniformat blu ofronin shpërblim prej 5000 eurosh.
