Prokuroria e Tiranës ka urdhëruar sekuestrimin e disa pasurive të shtetases Irma Hasani, një punonjëse e Drejtorisë së Shërbimeve Qeveritare, të cilat dyshohet se janë produkte të veprimtarisë kriminale. Në listën e pasurive të sekuestruara përfshihen një apartament, gjashtë automjete luksoze dhe mijëra euro.
Në kuadër të hetimeve për “Pastrimin e produkteve të veprës penale ose veprimtarisë kriminale,” prokuroria ka mbledhur prova që tregojnë se këto pasuri nuk justifikohen nga të ardhurat e ligjshme të shtetases I.H. dhe familjarëve të saj. Brenda një muaji, ajo kishte marrë në llogarinë e saj 180,000 euro në formë cash ose nëpërmjet transfertave bankare, kryesisht nga të afërm dhe ish-kunati. Një pjesë e madhe e këtyre parave, rreth 160,000 euro, u transferuan nga Hasani në llogarinë e një noteri për blerjen e një apartamenti.
Hetimet zbuluan se pasuritë e sekuestruara, përfshirë pesë prona të tjera dhe gjashtë automjete, janë të pajustifikuara në bazë të të ardhurave zyrtare të I.H., e cila prej vitit 2011 punon me një pagë bruto prej 61,000 lekësh në Drejtorinë e Shërbimeve Qeveritare.
Gjithashtu, Prokuroria ka marrë informacione nga Interpol Manchester se vëllai i Irma Hasanit, O.H., është arrestuar në Angli për vepra penale në fushën e narkotikëve. Pas analizës së të dhënave dhe dokumenteve të administruara nga hetimi, Prokuroria arriti në përfundimin se këto pasuri janë krijuar nga veprimtari kriminale në të cilën ka qenë i përfshirë vëllai i saj.
Prokuroria kërkoi vendosjen e masës së sigurimit pasuror “Sekuestron Preventive” për pasuritë e paluajtshme dhe automjetet e shtetases I.H. dhe familjarëve të saj. Automjetet që do të sekuestrohen përfshijnë një Volkswagen Golf 5, Renault Clio, Audi Q3, Volvo CX60, Mercedes Benz ML350 Bluetec dhe Audi SQ7.
Njoftimi i prokurorisë:
Prokuroria provoi se shtetasja I.H., e punësuar prej vitit 2011 në ‘Drejtorinë e Shërbimeve Qeveritare’, me një pagë bruto 61.000 lekë, nuk e justifikon blerjen e pasurive të luajtshme dhe të paluajtshme.
Ndërkohë, Departamenti i Policisë Kriminale, Drejtoria Kundër Narkotikeve dhe Trafiqeve në Drejtorinë e Përgjithshme të Policisë së Shtetit, me anë të shkresës nr.11958/1, datë 23.07.2021,informoi se: Departamenti për marrëdhëniet Ndërkombëtare ka njoftuar se Interpol Manchester kërkon informacion për verifikimin e shtetasit shqiptar O. H. pasi është arrestuar në Angli për veprën penale shkelje ligjit për narkotikët. Nga verifikimet rezultoi se ky shtetas është vëllai i shtetases I.H.
Sa më sipër, duke ju referuar kontratave noteriale të blerjeve të pasurive të paluajtshme dhe pasurive të luajtshme (automjeteve relativishit të shtrenjta) dhe huadhënieve të vlerave monetare, vërehet se këto janë nënshkruar pothuajse të gjitha në harkun kohor të viteve 2022-2024, mbas arrestimit të shtetasit O.H. për vepra penale në fushën e narkotikëve.
Nga sa më sipër dhe nga analiza në tërësi e provave dhe akteve të administruara nga hetimi i këtij procedimi penal, arrihet në konkluzionin se pasuritë e paluajtshme të shtetasve I.H., O.H. dhe familjareve të tyre janë produkte të veprës penale ose veprimtarise kriminale, në të cilat ka qenë i përfshirë shtetasi O.H.
Perfundimisht, organi i akuzës dyshon se pasuritë e krijuara nga shtetasja I. H. dhe familjarët e saj janë të krijuara nga burime të paligjshme dhe nuk i përgjigjen nivelit të të ardhurave si dhe nuk justifikohen me të ardhurat e realizuara edhe prej aktiviteteve tregtare të regjistruara ose punësimi i tyre me periudha të pjesshme.
Për këtë arsye kërkohet caktimi i masës së sigurimit pasuror “Sekuestron Preventive” për: pasuritë e paluajtshme, në emrin e shtetases I. H. dhe familjarëve të saj;
Nr.210/27, ZK1676 , Vol 23, Faqe 185;
Nr. 166/7, ZK1676 , Vol 23, Faqe 187;
Nr. 210/29, ZK 1676, Vol 23, Faqe 147;
Nr. 110/76, ZK3215, Vol 15, Faqe 106;
Nr.23/41+2-6, ZK3266, Vol 41, Faqe 69; dhe
Nr. 114/20, ZK 16776, Vol 4, Faqe 161
Sekuestrimin pranë Drejtorisë së Përgjithshme të Shërbimit të Transportit Rrugor Tiranë për automtetet:
Volksëagen golf 5;
Renault Clio;
Audi Q3;
Volvo CX60;
Mercedes Benz ML350 BLUETEC; dhe
Audi SQ7.
