Presidenti amerikan, Donald Trump, duhet të përpiqet të rivendosë udhëheqjen morale të SHBA-së, për t’u bërë “perandoria e së mirës”, kërkon ish-drejtuesi i sindikatës dhe presidenti polak Lech Walesa, tri ditë para vizitës së presidentit amerikan në Poloni.
Trump pritet të dielën në Varshavë, me rastin e 80 vjetorit të fillimit të Luftës së Dytë Botërore, që nisi më 1 shtator 1939, me një sulm të Gjermanisë naziste kundër Polonisë.
“Présidenti Trump, ju kërkoj të rifitoni pozicionin e liderit botëror për SHBA-në”, theksoi Walesa, 75 vjeç, drejtuesi i parë i Sindikatës Solidaritet dhe fitues i çmimit Nobel për Paqe, në një intervistë të publikuar sot nga e përditshmja “Rzeczpospolita”.
“Bota ka nevojë për lidershipin e SHBA-së. Për lidership moral dhe politik, jo vetëm për lidership ekonomik dhe ushtarak”, shtoi ai.
“Unë kam një mesazh për presidentin Trump. Për vite me radhë SHBA-ja ka qenë perandoria e së mirës, që ka udhëhequr botën”, theksoi Walesa.
“Ata ende kanë një përparësi ushtarake dhe ekonomike mbi të tjerët, por, moralisht e politikisht, SHBA-ja nuk është më lider botëror”, shtoi ai.
Duke folur për “perandorinë e së mirës”, ish-presidenti polak iu referohet shprehjes “perandori e së keqes” e përdorur në vitin 1983, në mes të krizës së “Euromissiles”, nga presidenti amerikan Ronald Reagan, si përcaktuese për ish-Bashkimin Sovjetik./SHBA/
