Mediat greke i kanë kushtuar mjaft vëmendje vdekjes së një 19-vjeçareje me origjinë shqiptare të cilës i është dhënë kokainë nga 3 persona në një hotel dhe që më pas e braktisën trupin e pajetë në anë të rrugës.
Ngjarja ndodhi në Argostoli të Kefalonisë. “Protothema” shkruan se shqiptarja e identifikuar vetëm me emrin Myrto humbi jetën nga një arrest kardiak. Hetuesit kanë mbledhur kamera sigurie dhe kanë marrë dëshmitë e 3 personave që ndodheshin me të dhe që janë arrestuar.
I arrestuar është një 23-vjeçar, ish-kampion në peshëngritje që ka dëshmuar se vajza e re përdorte vazhdimisht kokainë. Ai ka pranuar se drogën e kishte siguruar ai së bashku me një mik nga Shqipëria.
Bashkë ta ndodhej edhe një shqiptar tjetër 26 vjeç dhe një miku i tij 22 vjeç. Por kur 19-vjeçarja u rrëzua në tokë për shkak të marrjes së drogës, në vend që të telefononin shërbimet e urgjencës, ata u përpoqën të eliminonin provat që i implikonin, por edhe vetë Myrton, duke pretenduar se patën frikë.
Megjithatë, lëvizjet e tyre nuk tregojnë panik, por një qetësi të paparë dhe madje cinizëm. Ata vendosën ta nxirrnin vajzën nga hoteli në mënyrë që të mos inkriminonin veten. Në kamerat e sigurisë shihet ish-peshëngritësi që mban vajzën e re në duar Më pas ata e braktisën atë në një shesh dhe bënë sikur nuk e dinin.
Kur ambulanca mbërriti për të marrë Myrton, në agim, ekipet e shpëtimit e gjetën vajzën në një mur, të veshur dhe pa lëndime. 26-vjeçari dhe 22-vjeçari, të cilët janë arrestuar, ishin në vendngjarje dhe u thanë ekipeve të shpëtimit se po kalonin rastësisht dhe e gjetën 19-vjeçaren pa ndjenja.
Në fakt, të rinjtë e telefonuan ambulancën nga telefoni i 23-vjeçarit, i cili nuk ndodhej në vendin e ngjarjes ku u gjet vajza fatkeqe. Në atë moment, 23-vjeçari ishte kthyer në hotel për të pastruar zonën ku ishte përdorur kokaina, ndërsa e kishte fshehur edhe telefonin e saj celular në një dyqan vendas.
Si ndodhi ngjarja
Ishte herët në mëngjes të së martës kur 19-vjeçarja Myrto kishte vendosur të takonte të dashurin e saj 23-vjeçar. Siç i pohoi ai policisë, ata kishin caktuar të “rrinin bashkë” në një Airbnb për të dëgjuar muzikë dhe për të bërë muhabet.
“Në një moment, Myrto më tha: “Dua të pi”, që do të thotë se donte të përdorte kokainë. I thashë se njoh dikë që bën gjëra të tilla dhe e thirra (ish-peshëngritësin) nëpërmjet Instagramit dhe i thashë se donim një copë.
Ai erdhi në apartament rreth 15 minuta pasi e thirrëm dhe na solli një qese me kokainë dhe Myrto e pagoi. Nuk e di sa para i dha. Ai u ul me ne për rreth gjysmë ore, ku biseduam dhe qeshëm. Myrto kishte përdorur tashmë kokainë ndërsa ne të tre ishim atje.
Ish-peshëngritësi u largua dhe u kthye pas pak dhe solli një sasi tjetër kokaine, të cilën Myrto e kërkoi me këmbëngulje. Në një moment, erdhi (22-vjeçari nga Shqipëria), të cilin atleti e thirri dhe erdhi e u ul me ne”, pohoi ai.
23-vjeçari fajësoi 19-vjeçaren se u përpoq ta bindte që të mos merrte më drogë. “Në një moment, i thashë Myrtos të ndalonte dhe të mos përdorte më kokainë, sepse i thashë se e shihja që ishte çmendur pak”, – pohoi ai.
“Dola në ballkon dhe në një moment e pashë duke pasur konvulsione, duke u dridhur dhe duke qenë ulur në shtrat. Mendova se po e bënte për qejf, por ajo vazhdoi dhe ne e kuptuam se diçka nuk shkonte. U përpoqëm ta ndihmonim, por ajo nuk po vinte në vete” – tha ai.
I arrestuari pretendoi se më pas vendosi të thërriste një ambulancë, por u ndalua nga dy të tjerët.
“Më thanë se kishim frikë të merrnim ambulancën që të mos futeshin në telashe. (…) Pastaj më thanë se do ta çonin poshtë dhe do të thoshin se e kishin gjetur në rrugë. (Atleti) e mori në krahë pa ndjenja dhe e zbritëm. U përpoqa të merrja gjithçka nga atje në apartament, pasi kishim pirë pak shampanjë, lëngje dhe gjëra të tjera”, pohoi ai.
“Në një moment (atleti) u kthye dhe më tha se ambulanca e kishte marrë dhe se ishte mirë. (…) Mora celularin e saj, shkova në spital, ku pashë prindërit e saj dhe policinë dhe kisha frikë të shkoja ta lija, se mos futesha në telashe. Shkova në kafene… ku u thashë se një vajzë me emrin Myrto do të vinte ta merrte më vonë”, – u tha ai autoriteteve.
Pamjet tregojnë lëvizjet e fundit para zbulimit të 19-vjeçares. Videot tregojnë momentin kur e reja mbërrin në hotel dhe momentin kur ajo transportohet jashtë tij, ndërsa duket se është pa ndjenja.
Të mërkurën në mesditë, tre të arrestuarit u dërguan në gjykatë. Ndaj tyre është ngritur akuza e “vrasjes me dashje e kryer me mosveprim”, posedim dhe përdorimit të narkotikëve. Shërbimit kompetent të Mjekësisë Ligjore iu kërkua të kryente një autopsi.
